मन्त्रीमा छानिएका कांग्रेसका चार जनाले कहिले पाउँछन नियुक्ति

१७ वैशाख, काठमाडौं । नेकपा माओवादीका अध्यक्ष पुष्पकमल दाहाल प्रचण्ड नेतृत्वको सरकार पार्टीका तर्फबाट मन्त्री पठाउन  नेपाली कांग्रेसले व्यक्ति छानेर नाम सार्वजनिक गरेको एक महिना बितिसकेको छ । पार्टीबाट सँगै छानिएका चार जनाले एक महिनाको मन्त्रीको तल खाइसकेका छन् भने पछिल्लो समय मन्त्री भएर गएका कांग्रेस नेता एनपी साउदले परराष्ट्र मन्त्रालयको जिम्मेवारी लिएको पनि डेढ साता भइसकेको छ ।

प्रधानमन्त्रीसँग अब चार मन्त्रालय बाँकी छन् । कांग्रेसको भागमा परेका ८ मन्त्रालयमा पछि एउटा थपिएर ९ भएकाले अब चार जना पठाउनुपर्छ । कांग्रेसबाट मन्त्रीका लागि छानिएका पार्टी उपसभापति धनराज गुरुङ, डिकबहादुर लिम्बु र मोहनबहादुर बस्नेतको अझै मन्त्री बन्ने टुंगो छैन । सुरेन्द्र आचार्यको नाम पनि सार्वजनिक भएको छ । अन्य एक राज्यमन्त्री पनि कांग्रेसले पाउन सक्छ । तर, उनीहरू सरकारमा जान नपाएको अन्य कारणले नभई पार्टीकै आन्तरिक विवादका कारण हो । कांग्रेस संस्थापन पक्षबाट पाँच जना मन्त्री भइसकेका छन् । अब संस्थापन पक्षबाट एक कोइराला समूहबाट तीन मन्त्री पठाउन बाँकी छ ।    

सुरुमा अर्थ मन्त्रालयमा को जाने भन्ने विवाद आएको थियो । पछि परराष्ट्रमा पनि यस्तै विवाद आयो । महामन्त्री गगन थापाले आफै परराष्ट्रमा जाने मनसाय राखेपछि केही समय रोकिएको थियो । पछि सभापति शेरबहादुर देउवाले एनपी साउदलाई पठाए । त्यति बेला नै गुरुङ र लिम्बु पनि जानुपर्ने थियो । तर, उचित मन्त्रालय नपाएको भन्दै कोइराला समूहले नाम दिएन । अहिले आएर स्वास्थ्य मन्त्रालयमा पनि विवाद देखिएको छ । यतिबेला आएर सभापति देउवाले स्वास्थ्य मन्त्रालयमा मोहनबहादुर बस्नेतलाई पठाउन खोजिरहेका छन् । 

सत्तारूढ कांग्रेसले आफ्नोतर्फबाट मन्त्री बन्नेको नाम नपठाउँदा प्रधानमन्त्री प्रचण्डले मन्त्रिपरिषद्लाई अझै पूर्णता दिन सकेका छैनन् । शनिबार कांग्रेस सभापति देउवा र प्रधानमन्त्री प्रचण्डबीच छलफलमा देउवाले विराटनगर रहेका नेता डा. शेखर कोइराला आइतबार काठमाडौं फर्किने र कांग्रेसले चार जनालाई नै मन्त्रीमा पठाउने भनेका थिए । तर, स्वास्थ्य मन्त्रालयका विषयमा देउवा प्रधानमन्त्रीसँग कुनै कुरा राखेनन् । स्वास्थ्य मन्त्रालय पनि नपाउने भए कोइराला समूह सरकार नजाने पक्षमा छ । स्वास्थ्यमा देउवा र कोइरालाबीच सहमति भए मात्र उपसभापति गुरुङ, लिम्बु सरकारमा जाने छन् । 

सुरेन्द्र आचार्यको पनि मन्त्री हुने नहुने टुंगो छैन । समय घर्किँदै गएको र कोइराला समूहले थप एक मन्त्री पाउँदा सहमहामन्त्रीद्वय जीवन परियार र बद्री पाण्डे पनि आकांक्षी छन् । तर, आचार्य राष्ट्रपतिको कोटाबाट आएकाले उनलाई मन्त्री बनाउनुपर्ने दवावमा देउवा छन् । आचार्य सुरुमा कोइराला पक्षमै रहे पनि उनी राष्ट्रपतिबाट सिफारिस भएकाले सभापतिले उनलाई मन्त्री बनाउँदा  संस्थापन पक्षको  कोटाबाट बनाउनुपर्ने माग कोइराला पक्षको छ । 

यसरी सहमति भएमा सहमहामन्त्री जीवन परियारले माैका पाउन सक्छन् । अब कांग्रेसको  भागमा कानुन, न्याय तथा संसदीय मामिला, स्वास्थ्य तथा जनसंख्या, युवा तथा खेलकुद र खानेपानी मन्त्रालय बाँकी छन् । कांग्रेसले आठ मन्त्रालय पाउने सहमति भएकामा जनमत पार्टी सरकारबाट अलग भएपछि खानेपानी मन्त्रालय पनि थपिएको हो । उद्योग मन्त्रालय नपाएपछि जनमत चैत १७ मा सरकारबाट बाहिरिएको थियो ।