वर्षाले रोकिएको एसीसी प्रिमियर कपको फाइनल खेल फेरि सुरु

१८ वैशाख, काठमाडौं । वर्षाले रोकिएको एसीसी प्रिमियर कपको फाइनल खेल फेरि सुरु भएको छ । पानी परेपछि खेल आधा घण्टा रोकिएको थियो । फाइनलमा नेपाल र युएई त्रिवि क्रिकेट मैदानमा प्रतिस्पर्धा गरिरहेका छन् ।

टस हारेर ब्याटिङको निम्तो पाएको युएईले १६ ओभरमा ५ विकेट गुमाएर ६० रन बनाउँदा खेल रोकिएको थियो । खेल रोकिनु अघि युएईका आसिफ खान १५, बसिर हमिद ६ रनमा क्रिजमा थिए । प्रतियोगिताको विजेता टोली आगामी सेप्टेम्बरमा हुने एसिया कपमा छनोट हुने भएकाले यो खेल दुवै टोलीका लागि महत्वपूर्ण छ ।

यसैबीच बर्षाको कुनै प्रभाव नगरि खेल हेर्न बिहानैदेखि टीयू मैदानमा क्रिकेटप्रति क्रेज बाक्लो देखिएको छ  । मौसम अनिश्चित भएपनि नेपाली दर्शकको उल्लेख्य उपस्थिति रहेको छ ।  यसअघि शनिबार कुवेतसँगको सेमिफाइनल खेलमा पनि दर्शकको उतिकै उपस्थिति थियो ।