रास्वपाको केन्द्रीय समिति बैठकमा सरकारमा सहभागी हुनेबारे छलफल

१८ वैशाख, काठभमाडौं । राष्ट्रिय स्वतन्त्र पार्टी (रास्वपा)को केन्द्रीय समितिको बैठक केन्द्रीय कार्यालय बसुन्धरामा सुरु भएको छ । बैठकमा सरकारलाई दिएको समर्थन कायम राख्ने वा फिर्ता लिने भन्ने एजेन्डामा निर्णय लिइँदैछ । 

प्रधानमन्त्री प्रचण्डले रास्वपालाई औपाचारिक रुपमा भएको भेटमा रास्वपालाई सरकारमा सहभागी हुन आग्रह गर्दै आइरहेका बेला बैठक बसेको हो । मुख्य रुपमा बैठकमा सरकारमा सहभागी हुने या नहनुबारे छलफल भइरहेको महासचिव मुकुल ढकालले बताए ।

केन्द्रीय समितिपछि आजै दिउँसो ३ बजे पार्टीको संसदीय दलको बैठक पनि बस्दैछ । बैठकले पार्टी सभापति एवं सांसद रबि लामिछानेलाई दलको नेता चयन गर्ने निश्चित भएको छ । दल नेता रहेका उपसभापति डोलप्रसाद अर्याले गत साता मात्र राजीनामा दिएका थिए । वैशाख १० मा सम्पन्न उपनिर्वाचनमा चितवन २ बाट निर्वाचित लामिछानेकै लागि रिक्त गरिएको ठानिएको छ । लामिछानको सबै पदन गएपछि पार्टीले दलको नेताको जिम्मेवारी अर्याललाई दिइएको थियो ।

रास्वपा यसअघि माघ २२ मा सरकारबाट बाहिरिएपनि सरकारलाई समर्थन जारी राखेको छ । पार्टीभित्र पुरानै मन्त्रालय पाएको खण्डमा सरकारमा जानुपर्ने एकथरि र अर्कोथरि सरकारबाहिर बसेर पार्टी संगठन विस्तार र जनपक्षीय सरोकारका विषयमा सशक्त आवाज उठाउनुपर्ने धारणा रहेको छ ।

तर सभापति लामिछाने भने सरकार जाने पक्षमा देखिएका छन् । उनी यसअघि नागरिकता मुद्दामा उपप्रधान तथा गृहमन्त्री पद गुमाएका नेता हुन् । योपटक उनले पुनः उपप्रधानमन्त्रीसहित गृह ताकेका छन् ।

सरकारलाई दिँदै आएको समर्थन र सरकारमा सहभागी हुने वा नहुनेबारे हिजो आइतबार मात्र बालुवाटारमै पुगेर  प्रधानमन्त्री पुष्पकमल दाहाल ‘प्रचण्ड’सँग भेट गरेर छलफल गरेका थिए । सरकारबाहेक मुख्य लक्ष्य नरहने संसदीय दलको विशेषताका कारण रास्वपाको आजको बैठकले सरकारमा जाने पक्षमै निर्णय लिने राजनीतिक विश्लेषकहरुको तर्क छ ।