उजुरी दिन मिटरब्याज पीडितसँग रामेछाप प्रशासनकाे आग्रह

१८ वैशाख, काठमाडौं । सरकारले हरेक जिल्लामा मिटरब्याज (अनुचित लेनदेन) पीडितको खोजी तीव्र पारेको छ । खोजीका लागि गृहमन्त्रालयले शुक्रबार मात्र स्थानीय प्रशासनलाई परिपत्र गरेको थियो ।

पीडितका तथ्यांक संकलन र उजुरी लिन सरकारले शनिबार नै मधेश प्रदेशको जनकपुरधाममा अनुचित लेनदेन (मिटरब्याज) जाँचबुझ आयोगको केन्द्रीय कार्यालय संचालनमा लाइसकेको छ । 

अहिले जिल्ला प्रशासन कार्यालयहरुले सार्वजनिक जारी गरी पीडितको खोजी र पीडितलाई उजुरी दर्ताका आउन उर्दी जारी गरिरहेको छ । सोही क्रममा रामेछाप जिल्ला प्रशासन कार्यालयले आइतबार एक सूचना जारी गरेको छ । जिल्लाभित्र मिटर ब्याज पीडित भए सबुद प्रमाणसहित यही वैशाख ३१ गतेभित्र उजुरी दिन आह्वान सूचनामा गरिएको छ । 

उजुरी दर्ताका लागि कार्यालयमा मिटर ब्याज पीडित सहायता कक्ष समेत स्थापना भएको र त्यहाँ आएर उजुरी दिन सकिने जनाइएको छ । पीडितले प्रमाणसहित आयोगमा गएर उजुरी दिन सकिने पनि जनाइएको छ ।  प्रमुख जिल्ला अधिकारी (सीडीओ) अनिता निरौला छिन् ।