कानेपाेखरी गाउँपालिकाको केन्द्र भौंसाबारीमा सार्ने निर्णय

१८ वैशाख, काठमाडौं । मोरङको कानेपोखरी गाउँपालिकाको केन्द्र (सदरमुकाम) सार्ने भएको छ । आइतबारको गाउँसभा बैठकमा मतदानबाट लिइएकाे निर्णयपछि केन्द्र सार्ने भएको हो ।

पालिकाको प्रशासनिक केन्द्र हाल कानेपोखरी–८ स्थित रमाईलो बजारमा रहेको छ । निर्णय अनुसार अब केन्द्र वडा नम्बर ५ को भौसबारीमा सारिनेछ । 
आइतबार बसेको १३औं गाउँसभाको तेस्रो बैठकमा केन्द्र सार्ने एजेण्डामा सहमति जुट नसकेपछि मतदान प्रक्रिया अपनाइएको थियो । मतदान प्रक्रियामा दुई तिहाई (२७) सदस्यले सार्ने पक्षमा मतदान गरेका थिए ।  नसार्ने पक्षमा ७ जनाको मात्र मत परेको थियो । एक मत बदर भएको थियो ।

अब भौंसाबारी केन्द्रमा प्रमुख प्रशासकीय भवन लगायत पालिकाका सबै सम्पूर्ण काम सारिने उपाध्यक्ष भोला अधिकारीले बताए । आर्थिक वर्ष २०७८/०७९ मै पालिकाको केन्द्र स्थापनाका लागि भौंसाबारीमा २ करोड ५ लाखमा ए एक बिगाह जग्गा खरिद गरेको थियो ।