उपमेयरको गाडीले किचिएर धनुषामा १४ महिने बालिकाको मृत्यु

१८ वैशाख, काठमाडौं । उपमेयर चढ्ने गाडीले किचिएर धन्ुषामा १४ महिने बालिकाको मृत्यु भएको छ ।

हंसपुर नगरपालिकाकी उपमेयर दुर्गादेवी मण्डल चढ्ने बा १६ च ९२६ नम्बरको सुमोले किचिँदा हंसपुर नगरपालिका–९ रुदौलीका रवीन्द्र मण्डलकी छोरी लक्ष्मीनिया कुमारी मण्डलको घटनास्थलमै मृत्यु भएको हो । 

घटनाको पुष्टि जिल्ला प्रहरी कार्यालय धनुषाका प्रवक्ता प्रहरी नायव उपरीक्षक बेदप्रसाद गौतमले गरेका छन् । उनका अनु्सार घटना आइतबार दिउँसो आफ्नै घरमा गाडी ब्याक गर्ने क्रममा किचिएर बालिकाको घटनास्थलमै मृत्यु भएको हो । मृत्यु बालिका उपमेयर दुर्गादेवीको नातिनी हुन् । 

प्रहरीले गाडी चालक शहिदनगर नगरपालिका–४ का ३० वर्षीय दीपेन्द्रकुमार राय र गाडी नियन्त्रण लिएर अनुसन्धान गरिरहेको छ । घटनाका बेला गाडीमा को को थिए भन्नेबारे अनुसन्धान भइरहेको प्रहरीले जनाएको छ ।

दुर्गादेवी गत वर्ष वैशाख १० मा भएको स्थानीय तहको निर्वाचनमा कांग्रेसबाट उपमेयरमा विजयी भएकी थिइन् ।