बहिर्गमित लडाकुको हकमा स्यालहुइयाँ नमच्चाउः प्रधानमन्त्री

 १८ वैशाख, काठमाडौं । प्रधानमन्त्री पुष्पकमल दाहाल प्रचण्डले बर्हिगमित लडाकुलाई राहत उपलब्ध गराउने विषयमा सडकबाट सयलहुइयाँ मच्चाउन आवइसक नभएको बताएका छन् । उनले बहिर्गमित लडाकुको हकमा सर्वोच्च अदालतले गरेको फैसला कार्यान्वयन गर्न खोज्दा अहिले परिवर्तनविरोधीहरुले सडकमा स्यालहुइयाँ मच्चाइएको बताएका छन् ।

माओवादी केन्द्रको भ्रातृ संगठन अखिल नेपाल ट्रेड युनियन महासंघको महाधिवेशनलाई सोमबार सम्बोधन गर्दै दाहालले आफूहरू नजाग्दा स्यालहरू गर्जिरहेको टिप्पणी गरे । प्रचण्डले हामी नजाग्ने हो भने क्रान्तिकारी उपलब्धि उल्ट्याउनेतर्फ जाने भन्दै अब स्यालहरूका अगाडी क्रान्तिकारी शक्तिहरु एक हुन आवस्यक रहेको बताए । जनताको संघर्षबाट प्राप्त उपलब्धिहरू उल्टाउने कोसिस भइरहेको दाबी गर्दै अब उपलब्धि रक्षाका लागि सबै क्रान्तिकारीहरू सशक्त आन्दोलित हुनुपर्ने बताए । 

उनले भने,‘नेपाली जनताका धेरै संघर्षमार्फत प्राप्त उपलब्धिहरू उल्ट्याउने कोसिस भइरहेको छ । हिजो जनयुद्ध, जनआन्दोलनका क्रममा गरिएका बलिदानका असीमित कीर्तिमानप्रति धेरै ठूलो प्रहार हुन खोजेको छ । अहिले हेर्ने हो भने हरेक उपलब्धि उल्टाउन खोज्ने प्रवृत्तिलाई बढावा दिने काम भएको छ । राष्ट्रिय रूपमा अहिले हामी सबै यो प्रतिक्रान्ति र उपलब्धिहरूको रक्षाका निमित्त सशक्त आन्दोलित हुनुपर्ने अवस्था आइलागेको छ ।’ 

उनले अहिले सरकारले गरिररहेका सकारात्मक काम र पहलकदमीमाथि पनि प्रहार भइरहेको दाबी गरे । प्रचण्डले भने,‘हिजो सहिदलाई सम्मान गर्नुपर्छ भन्दा प्रहार भयो । बहिर्गमित लडाकुको हकमा सर्वोच्च अदालतले गरेको फैसला कार्यान्वयन गर्न खोज्दा अहिले स्यालहुइयाँ मच्चाइएको छ । हामी नजाग्ने हो भने क्रान्तिकारी उपलब्धी उल्ट्याउनेतर्फ जान्छ । हामी नजाग्दा स्यालहरु गर्जिएका छन् ।’

उनले माओवादी आन्दोलनको विद्रुपीकरण गर्ने र यसलाई आतंककै रूपमा प्रचार गर्ने काम भएको भन्दै आपत्ति जनाए । ’१२ बुँदे समझदारी पछिका गणतन्त्रका उपलब्धि उल्टयाउन खोज्ने ’स्यालहुइयाँ’ सहन तयार छैनौं’ उनले भने,’ इतिहासका कुँडाकर्कटलाई मिल्काउनुपर्छ ।’

उनले त्यस्ता कुँडाकर्कटहरुलाई जवाफ दिनकै लागि आफूले फागुन १ गत जनयुद्ध दिवसको दिन बिदा दिने निर्णय गरेको बताए । ’एकथरि मान्छेहरू माओवादी सरकारले गरेका कामको झुटो प्रचार गरिरहेका छन् । क्रान्तिलाई अपमानित गर्ने प्रयास भएको छ’ उनले भने,’हामीले अहिले पनि मजदुर आन्दोलनलाई एकताबद्ध गर्नुपर्नेछ । यसबीचमा समाजवादी मोर्चा बनाउने कुरा भएको छ ।मोर्चा बनाएर आन्दोलित हुन जरुरी छ । जसको विचार मिल्छ एकता गर्नुपर्छ । जोसँग राजनीति र कार्यनीति मिल्छ त्यसको मोर्चा आवश्यक छ ।’