फ्लाइङ स्कूल सञ्चालन गर्न २ संस्थालाई अनुमति

१९ वैशाख, काठमाडौं । संस्कृति, पर्यटन तथा नागरिक उड्डयन मन्त्रालयले फ्लाइङ स्कूल (पाइलट) संचालनका लागि अनुमति दिएको छ । मन्त्री सुदन किरातीले हालै मात्र शुभम् एभिएसन प्रालि र चन्द्र सूर्य एभिएसनलाई ‘कार्यविधि संशोधन’ गरेर हवाई उडान प्रशिक्षण (फ्लाइङ स्कुल) सञ्चालन इजाजतपत्र दिने निर्णय गरेका हुन् । 

साथै, अन्य इच्छुक संस्थाहरूलाई पनि आवेदनका लागि आह्वान गरेका छन् । दुई संस्था वर्षौंदेखि अनुमति पाउन मन्त्रालय धाउँदै आइरहेका थिए ।फ्लाइङ स्कुल सञ्चालनसम्बन्धी कानुन नबनेको कारण देखाउँदै मन्त्रालयले इजाजत जारी गर्न मानेको थिएन । 

‘मन्त्री किरातीले नागरिक उड्डयनसम्बन्धी संस्थालाई इजाजत दिनेसम्बन्धी कार्यविधि’ संशोधन गर्दै इजाजतपत्र जारी गरी फ्लाइङ स्कुल सञ्चालनका लागि ढोका खुला गरिदिएको चन्द्र सूर्य एभिएसनका सञ्चालक मानबहादुर थापाले बताए । 

झण्डै डेढ दशकअघि नेपालमा चितवनकोभरतपुरमा पहिलो फ्लाइङ स्कुल भरतपुरमा शिवानी एयर फ्लाइङ स्कुल संचालन भएको थियो । तर विद्यार्थीलाई अन्तर्राष्ट्रियस्तरको तालिम दिन नसक्दा बन्द भएको थियो ।

हालसम्म नेपाली पाइलटहरु विदेशमा अध्ययन र तालिम पूरा गरेर व्यवसायिक उडान गर्दै आइरहेका छन् । नेपाली विद्यार्थीले पाइलट अध्ययन गर्दा र व्यावसायिक उडानमा रहेका पाइलटहरूले नियमित गर्नुपर्ने पीपीसी (पाइलट प्रोफिसेन्सी चेक) र टाइप रेटिङ लगायतका तालिममा नेपालबाट झण्डै एक खर्ब रुपैयाँ विदेश पठाउँदै आएको मन्त्रालयका एक अधिकारीले बताए ।

एक जना पाइलटले १५ महिनाको पाइलट कोर्ष पूरा गर्दा ४५ देखि ७० लाख रुपैयाँसम्म विदेशका स्कूललाई तिर्नुपर्ने हुन्छ भने बसोबास र खाना लगायतमा १ करोडसम्म खर्च हुन्छ । अब नेपालभित्र संचालन हुने स्कूलमा विदेशी विद्यार्थीलाई समेत ल्याउने गरी लाग्नुपर्ने उनले बताए । अबको ४ वर्षभित्र फ्लाइङ स्कूल चलाइसक्नुपर्ने बताइएको छ ।

नागरिक उड्डयन प्राधिकरणका अनुसार, हाल नेपालमा अमेरिका, फिलिपिन्स र दक्षिण अफ्रिकाका फ्लाई स्कुलबाट हवाई उडान प्रशिक्षण लिएका पाइलटहरू नेपालमा जहाज तथा हेलिकोप्टर उडाउँदै आइरहेका छन् ।