स्वास्थ्य उपचारमा भएको सम्पूर्ण खर्च आफैँ व्यहोर्ने राष्ट्रपति पौडेलको घोषणा

१९ वेशाख, काठमाडौं । राष्ट्रपति रामचन्द्र पौडेलले भारतमा आफ्नो उपचारका क्रममा भएको खर्च आफैँ व्यहोर्ने घोषणा गरेका छन् । सरकारी ढुकुढीबाट राष्ट्रपतिको उपचार भएकोबारे आलोचना भएपछि राष्ट्रपतिले व्यक्तिगत खर्चमै उपचार गर्ने घोषणा गरेका हुन् । 

उपचारका क्रममा भएको सम्पूर्ण खर्च राष्ट्रपति स्वंयमले व्यहोर्ने घोषणा गरेको प्रेस संयोजक खिला कार्कीले जारी गरेको विज्ञप्तिमा उल्लेख छ । 

राष्ट्रपति  पौडेलको स्वास्थ्यमा समस्या देखिएपछि त्रिभुवन विश्वविद्यालय शिक्षण अस्पताल हुँदै  भारतको नयाँ दिल्लीस्थित अखिल भारतीय आयुर्विज्ञान संस्थान (एम्स)मा ११ दिन उपचार भएको थियो । उपचार गराएर उनी आइतबार मात्र स्वदेश फर्किएका थिए ।

उनको उपचारमा सरकारी ढुकुटीको रकम खर्च हुन नहुने भन्दै कांग्रेस महामन्त्री गगन थापाले खर्च भएको सम्पूर्ण रकम राष्ट्रपति स्वयंमले व्यहोर्नु पर्ने बताउँदै आएका थिए ।

उपचारमा के कति खर्च भएको हो ? भन्ने विवरण भने सार्वजनिक भएको छैन ।