नाबालिगमाथि करिणी प्रयासको आरोपमा सशस्त्रका हवल्दार पक्राउ

१९ वैशाख, काठमाडौं । एक नाबालिगलाई जबर्जस्ती करणी गर्न खोजेको आरोपमा कञ्चनपुर प्रहरीले एकजना सशस्त्र प्रहरी हवल्दारलाई पक्राउ गरेको छ ।

झलारीस्थित सशस्त्र प्रहरीको ३५ नम्बर गणमा कार्यरत भीमदत्त नगरपालिका–९ ब्रम्हदेवका हवल्दार अमरसिंह बुढालाई प्रहरीले आइतबार पक्राउ गरेको हो ।

उनीविरुद्ध जबर्जस्ती करणी उद्योगमा जिल्ला अदालतबाट म्याद गराई अनुसन्धान भइरहेको जिल्ला प्रहरी कार्यालय कञ्चनपुरले जनाएको छ । बुबा बिरामी परेको भन्दै बिदा लिई घर पुगेका उनले आइतबार मध्यरात १५ वर्षीया बालिका सुतेको घरमा जबर्जस्ती प्रवेश गरेर करणीकाे प्रयास गरेकाे प्रहरीकाे दाबी छ । प्रवेशपछि ब्यूँझिएकी नाबालिग कराउँदा घरका सदस्य र छिमेकीले प्रहरीलाई खबर गरेका थिए । 

पीडितका आफन्तले सोमबार प्रहरी कार्यालयमा उजुरी दिएपछि बुढालाई पक्राउ गरिएको हो । पक्राउ परेका बुढालाई गणबाट निलम्बन गरेको जनाइएको छ ।