बिहान बुबा समातिए, दिउँसो छोरा निरजविरूद्ध पक्राउ पुर्जी जारी

१९ वैशाख, काठमाडौं । प्रहरीले नेपालीलाई भुटानी शरणार्थी बनाएर अमेरिका उडाइदिने भन्दै करोडौं रूपैयाँ ठगीमा संलग्न रहेको आरोपमा तत्कालीन गृहमन्त्री रामबहादुर थापाका सुरक्षा सल्लाहकार इन्द्रजित राईका छोरा निरज राई विरुद्ध पनि पक्राउ पुर्जी जारी गरेको छ । मंगलबार बिहान इन्द्रजितलाई पक्राउ गरेपछि उनका छोरा निरजको नाममा प्रहरीले पक्राउ पुर्जी जार गिरेको हो । 

निरजलाई नेपालीलाई भुटानी शरणार्थी बनाएर अमेरिका उडाइदिने भन्दै रकम असुल गर्ने गिरोहका मुख्य योजनाकारको रुपमा प्रहरीले खोजिरहेको छ । निरजले आफ्ना बाबु गृहमन्त्री थापाका सुरक्षा सल्लाहकार भएको भन्दै गिरोहलाई सघाउने र पैसा उठाउने काम गरेर ठगी गरेको पाइएको प्रहरीले जनाएको छ । छोरा निरजसहित उनलाई पक्राउ गर्ने कोसिस प्रहरीले गरे पनि निरज नभेटिएपछि प्रहरीले बुबा इन्द्रजितलाई पक्राउ गरेको थियो ।

नक्कली शरणार्थी बनाएर पैसा असुल्ने गिरोहका नाइकेहरू केशव दुलाल, सानु भण्डारी, सागर थुलुङ राई, टंक गुरुङ र सन्देश शर्मा पोखरेल पक्राउ परेपछि तिनले दिएको बयानका आधारमा राईका बाबुछोरा पनि अनुसन्धानमा तानिएका थिए । निरज व्यापारी समेत हुन् । उनी नेपाल बाहिर भागेको हुनसक्ने प्रहरीको अनुमान छ । इन्द्रजित भने सौखेलस्थित निवासबाटै पक्राउ परेका थिए । तर निवासमा छोरा निरज भने प्रहरीले भेटेन ।

२०७४ फागुनदेखि २०७८ असारसम्म गृहमन्त्री रहेका बादलका सुरक्षा सल्लाहकार राईले भुटानी शरणार्थी समस्या समाधानमा स्थायी तवरको उपाय पहिल्याइने भन्दै गृह मन्त्रालयबाट नीतिगत असंगत निर्णयहरू गराएको र नक्कली शरणार्थी बन्न जनही बढीमा ५० लाखसम्म रकम असुल्न मार्ग प्रशस्त गरिदिएको बयानमा खुलेको छ । प्रहरी परिसर टेकुमा राखिएका राईले समेत विभिन्न चरणमा गरेर पाँच करोड रूपैयाँभन्दा बढी आफूबाट लिएको भनेर पक्राउ परेका गिरोहका सदस्यले बयानमा जनाएका छन् ।

यो गिरोहलाई आफूले समेत मन्त्रालय तहमा विभिन्न कठिनाइ आइ पर्दा सहयोग गरेको र गिरोहका नाइके दुलाल, भण्डारीसँग आफ्नो पुरानो चिनजान रहेको भन्दै तत्कालीन ऊर्जा मन्त्री टोपबहादुर रायमाझीले स्विकारिसकेका छन् । पक्राउ परेका मध्ये दुलाल तत्कालीन परराष्ट्रमन्त्री सुजाता कोइरालाका निजी सहायक थिए भने भण्डारी ऊर्जा मन्त्री रायमाझीकै सहयोगी थिए ।

 बयानमा तत्कालीन गृहमन्त्री बादलका छोरा प्रतिक र इन्द्रजितका छोरा निरजको नामसमेत रकम संकलनकाे मध्यस्थकर्ताका रुपमा आइसकेको छ । उपत्यका अपराध अनुसन्धान कार्यालयले गरेको प्रारम्भिक अनुसन्धानमा गिरोह सञ्चालन र रकम असुलीमा राईको प्रत्यक्ष संलग्नता रहेको प्रमाण पाइएको थियो ।