उपराष्ट्रपति कार्यालयका सचिव टेकनारायण पाण्डे पक्राउ

२० वैशाख, काठमाडौं । नक्कली शरणार्थी बनाएर नेपालीलाई अमेरिका लैजाने प्रकरणको अनुसन्धानका क्रममा उपराष्ट्रपति कार्यालयका सचिव टेकनारायण पाण्डे पक्राउ परेका छन् । उनलाई काठमाडौं प्रहरी परिसरले मध्याह्न पक्राउ गरेको हो । पाण्डेलाई टेकुस्थित प्रहरी परिसरमा राखिएको छ । प्रहरीले बुधबार उनलाई पक्राउ गर्न अदालतबाट पक्राउ पुर्जी लिएको थियो ।

मंगलबार तत्कालीन गृहमन्त्री रामबहादुर थापाका सुरक्षा सल्लाहकार इन्द्रजित राई पक्राउ परेपछि सचिव पाण्डे घर छाडेर बाहिर बसेका थिए । भक्तपुर आसपासको जंगलमा आफू रहेको प्रहरीले सुइँको पाएको थाहा भएपछि उनी त्यहाँबाट हिँडेका थिए । त्यही क्रममा उनी जडिबुटीबाट पक्राउ परेको प्रहरीले जनाएको छ । उनी २०७८ साल साउन २७ गतेदेखि २०७९ असोज २ गतेसम्म गृहसचिवका रूपमा कार्यरत थिए ।

उपराष्ट्रपति कार्यालयमा आउनुअघि गत वर्ष उनी गृह मन्त्रालयको सचिव थिए । मन्त्रालयको सचिव भएकै अवस्थामा नक्कली शरणार्थी प्रकरण र गिरोहसँगको साँठगाठमा उनी मुछिएका थिए । प्रहरीका  अनुसार गिरोहसँग रकम लेनदेनमा उनीसमेत मुछिएका छन् । हिरासतमा रहेका गिरोहका नाइकेहरूले दिएको बयानका आधारमा उनलाई पक्राउन गरिएको हो । 

उनी गृह मन्त्रालयमा सचिव रहेका बेला बाग्लुङ, पर्वत लगायत जिल्लाका मानिसलाई नक्कली शरणार्थी बनाएर अमेरिका उडाउने धन्दा चलाएर एक गिरोहले करोडौं रकम असुल्ने काम गरेका थिए । 

प्रकरणमा यसअघि गिरोहका नाइके भनिने केशव दुलालसहित ५ जना पक्राउ परिसकेका छन् भने मंगलबार मात्र तत्कालीन गहृमन्त्री रामबहादर थापा ‘बादल’को सुरक्षा सल्लाह रहेका सुरक्षाविद् इन्द्रजित राई ललितपुरबाट पक्राउ गरिएको छ ।

राईका छोरा निरजविरुद्धलाई प्रहरीले पूर्जी बोकेर खोजी गरिरहेको छ । बादलका छोरा प्रतीक पनि यो प्रकरणमा मुछिएका छन् । उनलाई पक्राउ गर्ने नगर्नेबारे भने प्रहरीले अध्ययन गरिरहेको जनाइएको छ ।