प्रहरीद्वारा एमाले सचिव टोपबहादुर रायमाझी र छोरा सन्दीपविरुद्ध पक्राउ पुर्जी जारी

२० वैशाख, काठमाडौं । काठमाडौं जिल्ला प्रहरी कार्यालयले नेकपा एमालेका सचिव एवं सांसद टाेपबहादुर रायमाझी र उनका छोरा सन्दीप रायमाझीविरुद्ध पक्राउ पुर्जी जारी गरेको छ । बुधबार काठमाडौं प्रहरीले जिल्ला अदालत काठमाडौंबाट रायमाझीका बाबुछोराविरुद्ध पक्राउ पुर्जी लिएर जारी गरेको हो । 

नक्कली शरणार्थी बनाएर नेपालीलाई अमेरिका लैजाने प्रकरणको अनुसन्धानका क्रममा बाबुछोराविरुद्ध पक्राउ पुर्जी जारी गरिएको  प्रहरीले जनाएको छ । रायमाझीका बाबुछोराले भुटानी शरणार्थी बनाएर अमेरिका लैजाने भन्दै १० देखि ५० लाखसम्म उठाउने गिरोहसँग साँठगाँठ गरेको प्रहरीको भनाइ छ । 
रायमाझीले राजनीतिक तहबाट उक्त गिरोहलाई संरक्षण दिनुका सार्थ आर्थिक लाभ लिएको प्रहरीले जनाएको छ । मंगलबार तत्कालीन गृहमन्त्री रामबहादुर थापाका सुरक्षा सल्लाहकार इन्द्रजित राईलाई पक्राउ गरिएको थियो ।

आज नै उपराष्ट्रपति कार्यालयका सचिव तथा पूर्वगृहसचिव टेकनारायण पाण्डेलाई पक्राउन गरिएको छ । उक्त गिरोहलाई हाल एमाले सचिव रहेका टोपबहादुर रायमाझीले सहयोग गरेको पुष्टि भएको छ । गिरोहका सदस्यले रायमाझीका छोराका नाममा काटेको डेढ करोडको चेक पनि प्रहरीले बरामद गरेको छ ।

पैसा उठाउने गिरोहमा तत्कालीन गृहमन्त्री थापाका सुरक्षा सल्लाहकार राई, उनका छोरा निरज, केशवप्रसाद दुलाल, सन्देश शर्मा, सानु भण्डारी, अशोक पोखरेल, सागर थुलुङ राई र टंक गुरुङ सक्रिय रहेको कागजातबाट पुष्टि भएको छ । उनीहरुसँगै रायमाझीका बाबुछोरा र सचिव पाण्डे पनि सामेल भएको प्रहरीको भनाइ छ ।