तनहुँ ट्रक दुर्घटनाका घाइतेमध्ये बालकसहित ३ जनाको मृत्यु

२० वैशाख, दमाैली । आज बिहान तनहुँको आँधीखोलामा मालवाहक ट्रकले बजार क्षेत्रका एक घरमा ठक्कर दिँदा भएका घाइतेमध्ये ३ जनाको मृत्यु भएको छ ।

बिहान ९ बजेतिर तनहुँ बन्दीपुर गाउँपालिका–५ आँधीखोलास्थित पृथ्वी राजमार्ग सडक खण्डमा डुम्रेबाट मुग्लिनतर्फ जाँदै गरेको ना ४ ख १९७३ नम्बरको ट्रकले सडक छेउमा रहेको पोलमा ठक्कर दिई स्थानीय सुनमायाको घरमा ठाेक्किएर ठूलो क्षति पुर्याएकाे थियो । घरमा रहेका ११ जना घाइते भएका थिए । 

चितवनको मेडिकल कलेजमा उपचाररत घाइतेमध्ये  ११ वर्षीयआयुष भुजेल, ४१ वर्षीय चेतबहादुर घर्ती र ७० वर्षीय सनबहादुर भुजेलको मृत्यु भएको हो । मृत्युको पुष्टि जिल्ला प्रहरी कार्यालय तनहुँका प्रहरी नायव उपरीक्षक मोहनबहादुर खाँणले गरेका छन् । अन्य ८ जना घाइतेमध्ये ५ जनाको पुरानो मेडिकल कलेजमा उपचार भइरहेको जनाइएको छ ।

दुर्घटनामा ८ जना घाइते भएको र सबैलाई उपचारको लागि चितवनस्थित पुरानो मेडिकल कलेज भरतपुर पठाएकोमा ३ जनाको उपचारको क्रममा अस्पतालमा मृत्यु भएको प्रहरीले जनाएकाे छ । आक्रोशित स्थानीयले सडक अवरुद्ध गरेका छन् ।