रायमाझी हराएपछि अन्य दुई विशिष्टमाथि पक्राउ पुर्जी जारी गर्ने अभियानबाट पछि हट्यो प्रहरी

२२ वैशाख,काठमाडौं । नेपाली नागरिकलाई भुटानी शरणार्थी बनाएर अमेरिका लैजाने भन्दै गरिएको ठगीसम्बन्धी अनुसन्धानमा तानिएका पूर्वउपप्रधानमन्त्री एवं एमाले सचिव टोपबहादुर रायमाझी अहिलेसम्म सम्पर्कविहीन छन् । उनी पक्राउ पर्ने डरले सम्पर्कबाहिर बसेका हुन या उनलाई लुकाइएको हो भन्ने यकिन छैन् । उनी बिहीबार बिहान पक्राउ परेको जानकारी प्रहरी स्रोतले नै दिएको थियो ।   

प्रहरीको माथिल्लो स्रोतलाई उल्लेख गर्दै रायमाझी पक्राउ परेको खबर सञ्चारमाध्याम आएका थिए । तर, नेकपा एमालेका अध्यक्ष केपी शर्मा ओलीले प्रधानमन्त्री प्रचण्डलाई भेटेपछि एकाएक रायमाझी सम्पर्कबिहिन भएको बताइयो । ओलीले प्रधानमन्त्री भेटेपछि यस प्रकरणको अनुसन्धानमा सक्रिय रहेको प्रहरी प्रशासनको काम कारवाहीले नै अनुसन्धानमा राजनीतिक प्रभाव परेको देखाएको छ । 

उच्च प्रहरी स्रोतले दिएको जानकारी अनुसार बिहीबार प्रहरीले एक पुर्वगृहमन्त्री र एक पुर्वगृहसचिवलाई पक्राउ गर्न आदलतबाट पक्राउ पुर्जी अनुमति लिने तयारीमा थियो । तर, उनीहरुका नाममा पुर्जी काट्न अदालतमा अनुमति लिन जाने प्रहरीको अभियान नै एकाएक स्थगित भएको छ । एमाले सचिव रायमाझीका नाममा पुर्जी काटिएपछि यो प्ररकण सम्लग्न अन्य राजनीतिक तहका अन्य व्यक्तिहरु जोगिने स्थिति देखिएको छ । 

प्रधानमन्त्री र अध्यक्ष ओलीबीच भेटघाट भएपछि नक्कली शरणार्थी प्रकरणको मुद्दाले  नै अर्कै मोड लिने स्थिति देखिन थालेको छ । स्रोतको भनाइमा उप्रधान तथा गृहमन्त्री नारायणकाजी श्रेष्ठ पनि अहिले ठूलो दवावमा परेका छन् । नेकपा एमाले जस्तो ठूलो पार्टी पूर्वप्रधानमन्त्रीसमेत रहेका ओलीको दवावले थप दोषीमाथि जाइलाग्ने कि नलाग्ने भन्ने दोधारमा गृहमन्त्री परेका छन् । यो प्रकरण २०७४ भन्दा अगाडी देखिकै भएकाले अनसुन्धानमा धेरै उच्च तहका तानिने सम्भावना थियो । तर, अब लगभग यो प्रकरणले अकै मोड लिने स्थिति पैदा भएको छ । त्यो पनि उच्च राजनीतिक तहबाटै ।  

पक्राउ परेकाहरुले बयानका क्रममा एक पूर्वगृहमन्त्री र एक पुर्वगृहसचिवको नाम पनि लिएका थिए । उनीहरुकै बयानका आधारमा पूर्वगृहसचिव तथा हाल उपराष्ट्रपति कार्यलयका सचिव टेकनारायण पाण्डेलाई पक्राउ गरिएको थियो । नक्कली शरणार्थी बनाएर अमेरिक पठाउने प्रकरणका मुख्य व्यक्ति नै यो राजनीतिक हस्तक्षेपले जागिने स्थिति देखिएको छ । नेपाली नागरिकलाई नक्कली भुटानी शरणार्थी बनाउन गृहमन्त्रालयमा कार्यलय समय सकिएपछि राती ११ बजेसम्म पनि काम हुने गरेको प्रहरीले पत्ता लगाएको छ । 

यो त अमेरिक जान नपाएकाहरुले उजुर गरेको विषय मात्रै हो । यही प्रकरणबाट धेरै नेपाली अमेरिका पुगिसकेको र भुटानी शरणाथी सम्बन्धी छानविन गर्न बनेको समितिभन्दा अगाडीका घटनाहरु बाँकी नै छन् । यी त पछि भएका घटनामा पनि थोरै मात्र भएको स्रोतको दावी छ । यसको मिहिन अनुसन्धान गर्ने आँट प्रहरीले गर्ने र राजनीतिक हस्तक्षेत्र नहुने हो भने नेपालमा अहिलेसम्मकै ठूलो ठगी काण्डको पर्दाफास हुन्छ ।  

उच्च स्रोतको भनाइमा प्रहरीले पक्राउ पुर्जी काट्ने तयारी गरेका ति पूर्वगृहसचिव साँझ ८ बजेदखि राती ११ बजेसम्म मन्त्रालयमा नै बसेर यससम्बन्धी काम गर्थे । उनले गृहप्रशासन सुधारका लागि राती अबेरसम्म बसेर काम गर्ने गरेको समाचार पनि उक्त समयमा प्रकासित भएका थिए । राती ८ बजेपछि मन्त्रालय सुनसान हुने र उक्त समय पछि गिरोहका नाइकेहरु गृहमन्त्रालय छिर्ने गरेको थिए ।

ती एक पूर्वगृहमन्त्री र एक पूर्वगृहसचिवलाई नियन्त्रण लिए यो प्रकरणको थप पर्दाफास हुने स्रोतको भनाइ छ । तर, कथाले नयाँ मोड लिएकाले पक्राउ गरेकामाथि मुदद दायरनै भएपनि सामान्य धरौटीमा उनीहरु बाहिर आउने देखिएको छ । पुर्जी काट्ने तयारी गरिएकालाई पक्राउ नगर्न दवाव आएपछि प्रहरीले पनि थप जाँगर नचालाउने परिस्थिति खडा हुँदै गएको छ ।