सूचना दाताको सुरक्षाका लागि सरकार गम्भीर छ : सञ्‍चारमन्त्री

२२ वैशाख, काठमाडौं । सरकारी प्रवक्ता एवं सञ्चार तथा सूचना प्रविधिमन्त्री रेखा शर्माले सूचनादाताको सुरक्षाका लागि सरकार गम्भीर रहेको बताएकी छन् । 

शुक्रबार राष्ट्रिय सूचना आयोगको १६औं स्थापना दिवसमा आयोजित कार्यक्रमलाई सम्बोधन गर्दै सरकारी सेवा प्रवाह छरितो र पारदर्शी बनाउने काममा सरकार निरन्तर लागिरहेको बताइन् । जनताले सूचनाको माग्ने कार्यालाई सरकारी अधिकारीहरुले झन्झट मान्न नहुने बताइन् ।

उनले सूचनाको हकसम्बन्धी ऐनको पूर्ण कार्यान्वयनको लागि सम्बन्धित निकाय गम्भीर बन्नुपर्ने बताउँदै सरकारले सार्वजनिक सूचनाको अध्यावधिक र स्वतः प्रकाशनको कामलाई प्राथमिकताका साथ अघि बढाउने प्रतिवद्धता व्यक्त गरिन् ।

जनतालाई सरकारका गतिविधि र सूचना एकद्वार प्रणालीबाट प्राप्त गर्न सहजता दिन सबै मन्त्रालयसँग सम्बन्धित गतिविधि जानकारी एकीकृत अनलाइन प्रणालीबाट सार्वजनिक गर्ने अन्तिम तयारीमा रहेको जानकारी दिइन् ।