सिम्रिक एयरको हेलिकप्टर दुर्घटनामा पाइलटसहित ५ जना गम्भीर घाइते, सेनाकाे हेलिकोप्टरबाट काठमाडौंं ल्याइँदै

२२ वैशाख, काठमाडौं । शुक्रबार दिउँसो संखुवासभाको भोटखोला गाउँपालिका–४ सिप्रुङस्थित जिजिङखामा भएको सिम्रिक एयरको हेलिकोप्टर दुर्घटनामा पाइलटसहित ५  जना घाइते भएको खुलेको छ । 

माथिल्लो अरुण जलविद्युत आयोजको सामान पुर्याउने क्रममा हेलिकोप्टर जिजिङखा पाखामा दुर्घटना भएको हो । दुर्घटनामा पाइलट, कोपाइलट र हेलि टिमका एक सदस्यसहित ५ जना घाइते भएका छन् । घाइते हुने अन्यमा स्थानीइ सुरेन्द्र पौडेल र भविन गुरुङ रहेका छन् । 

घाइतेमध्ये केहीको अवस्था गम्भीर रहेको र उनीहरुलाई नेपाली सेनाको हेलिकोप्टरबाट उपचारका काठमाडौं ल्याउने तयारी भइरहेको स्थानीय वाङ भोटेले बताए । दुर्घटनास्थलमा स्थानीय र नेपाली सेनाको टोली पुगेको र अहिले उद्धार कार्य भइरहेको उनले बताए ।

दुर्घटनाको विस्तृत विवरण आउन बाँकी रहेको जिल्ला प्रहरी कार्यालय संखुवासभाले जनाएको छ ।