संघीयता घाँडो भएको कुरा सबैले महसुस गरेका छन् : चित्रहादुर केसी

२५ वैशाख, काठमाडौं । राष्ट्रिय जनमोर्चाका अध्यक्ष समेत रहेका सांसद चित्रबहादुर केसीले राष्ट्रका लाष्गि संघीयता ‘घाँडो’ भएको विषय सबैलाई महसुस हुन थालेको बताएका छन् । 

उनले सोमबार बसेको प्रतिनिधिसभाको बैठकमा विशेष समयमा बोल्दै सांसद केसीले राष्ट्रिय जनमोर्चाले संविधान जारी गर्दैगर्दा संघीयता मुलुकले धान्न सक्दैन भनेको कुरा अहिले पुष्टि हुँदै गएको बताए । 

संघीयता अब मुलुकले धान्ने नसक्ने बताउँदै उनले संघीयताकै कारण सरकारको खर्च बढेर अर्थतन्त्र संकटमा परेको बताए । संघीयताले खर्च मात्र नभइै भ्रष्टाचार समेत बढाएको भन्दै संघीयता थेग्न मुश्किल भइसकेको बताए । 

संघीयतामा गएर गल्ती गरेको महसुस सबै दल र तिनका नेताहरुले गर्न थालेको देखेर आफूलाई जनमोर्चाले उठाएको मुद्दा सही भएकोमा सन्तोष लागेको बताए । संसदमा सहभागी दलहरुमध्ये जनमोर्चा, राप्रपा खरो रुपमा संघीयताको विरोधमा उभिएका छन् ।

केसीले सरकारले बाँझो खेतबारी संचालनबारे आगामी बजेटमा ठोस व्यवस्था गर्नुपर्ने बताए । मल कारखाना संचालन गर्न यसै बजेटमा आवश्यक रकम विनियोजन गर्न माग गरे । भ्रष्टाचारीलाई कारवाही गर्ने विषयमा जनमोर्चा स्पष्ट रहेको र नेपालीलाई भूटानी शरणार्थी बनाएर विदेश पठाउने धन्दामा लाग्ने सबैलाई कारवाहीको दायरामा ल्याउनुपर्ने बताए ।

उनले नक्कली भूटानी शरणार्थी प्रकरणमाथि भइरहेको अनुसन्धानबारे भने, ‘नेपालीलाई भुटानी शरणाथीृ बनाउने घटनाका दोषीमाथिको अनुसन्धान दूधको दूध पानीको पानी होस् ।’