दोषी नभए किन भागे एमाले सचिव टोपबहादुर रायमाझी ?

 २५ वैशाख, काठमाडौं । नेपालीलाई नक्कली शरणार्थी बनाएर अमेरिका पठाउने भन्दै ठगी गरिएको घटनामा दोषी देखिएका पूर्वमन्त्री एवं नेकपा एमालेका सचिव टाेपबहादुर रायमाझी पाँचदिनदेखि वेपत्ता छन् । अर्घाखाँचीको एक कार्यक्रममा सभामुख देवराज घिमिरेसँगै प्रमुख अतिथि बनेर बुटवल झरेका रायमाझी त्यसयता सम्पर्कमा छैनन् । उनी साच्चै हराएको भए उनको परिवारले खोजी गर्नुपर्ने हो । तर, परिवाले पनि खोजिपाउँ भनेर हराएको सूचना दिएको छैन् ।  

कतिपयले अनुसन्धानमा रहेका प्रहरीले नै रायमाझीलाई लुकाएको आशंका गरेका छन् भने रायमाझी नेकपा एमालेका अध्यक्ष केपी शर्मा ओलीको बालकोट निवासमा रहेको बताएका छन् । शुक्रबार अपराह्नदेखि नै रायमाझी केपी ओलीको निवासमा बसिरहेका निकटस्थहरु बताउँछन् । तर, ओलीले भने आफुले उनी लुकेको ठाउँ नदेखेको भन्दै व्यांगात्कम उत्तर दिँदै आएका छन् ।  

प्रशरीले पक्राउ पुर्जी जारी गरेपछि सम्पर्कमा नरहेका सांसद रायमाझी दोषी नभए भाग्नुपर्ने कारण थिएन । यस प्रकरणबाट करोडौ रकम लिएकै कारण उनी अहिले लुकेर बसेका छन् । संसदमै पनि रायमाझी एमाले अध्यक्ष ओलीकै घरमा बसेको भन्दै तत्काल बुझाउनुपर्ने आवाज उठेको थियो । फौजदारी कसूरको अनुसन्धानमा प्रहरीले आधारभूत मूल्यमान्यता भत्कने गरी गोप्य राख्नुपर्ने सूचना चुहाएर आरोपितलाई भाग्ने मौका दिइएको विषयले पनि संसदमा प्रवेश पाएको छ । 

जिल्ला अदालत काठमाडौंले वैशाख २० मा नेकपा एमालेका सचिव एवं पटक पटक मन्त्री बनिसकेका रायमाझी, उनका छोरा सन्दीप र प्रतीक थापालाई पक्राउ गर्ने अनुमति दिएको थियो । नेपालीलाई भुटानी शरणार्थी बनाएर अमेरिका मानव तस्करी गर्ने गिरोहमा सामेल भएको आरोपमा उनीहरू विरुद्ध अदालतले पक्राउ पुर्जी जारी गरेको हो । 

प्रहरीले यो प्रकरणमा अझै १०–११ जना पक्राउ पर्ने बताइरहेका बेला फरार रहेका रायमाझीलाई समाउन प्रहरीले ने आनाकानी गरिरहेको छ । यो यस्तो मुद्दा हो, जुन उच्च राजनीतिक र प्रशासनिक व्यक्तिहरूको संलग्तामा संगठित रूपमा ८७५ जना नेपालीलाई भुटानी शरणार्थीको मान्यता दिलाएर अमेरिका पठाउने योजना थियो । पाँच वर्षदेखि निर्बाध चलिरहेको यो प्रकरणको केन्द्रमा गृह प्रशासनको सिंगो संयन्त्र नै जोडिएको खुलेको छ । तर, संगठित अपराधको कसूरमा अनुसन्धान गरिरहेको त्यही प्रहरीले आरोपित उम्कने गरी अनुसन्धानका सूचना चुहाउँदै आरोपीहरु भगाउन सुरु गरेको छ । 

आफू विरुद्ध पक्राउ पुर्जी जारी भएपछि केही समय प्रहरीको सम्पर्कमा नै रहेका पूर्व मन्त्री रायमाझी अझै गायब छन् । आफैले सूचना चुहाएको प्रहरी पनि उनी हराएको भन्दै ढुक्कसाथ बसेको छ । अनुसन्धान निचोडमा नपुग्दै काम देखाउन वा अरू प्रयोजनका लागि यस्ता सूचना दिनु अपराध अनुसन्धानको आधारभूत सिद्धान्त विपरीत हो । तर, प्रहरी अधिकारीहरूले यस्ता सूचना चुहाउँदै आएका छन् । वैशाख २० मा पक्राउ पुर्जी जारी भएका तीन जनामध्ये एक जनालाई मात्र प्रहरीले नियन्त्रणमा लिएको छ । पूर्व मन्त्री रायमाझीका छोरा सन्दीपलाई प्रहरीले २० गते साँझ लुम्बिनी प्रदेशको बुटवलबाट पक्राउ गरेको थियो । पूर्वमन्त्री रायमाझी र प्रतीक भने फरार छन् । प्रतीक पूर्व गृहमन्त्री रामबहादुर थापाका छोरा हुन् ।

पक्राउ पुर्जी जारी भएको दिन एमाले सचिव रायमाझी गृहजिल्ला अर्घाखाँचीस्थित एक कार्यक्रममा सहभागी थिए । प्रतिनिधिसभाका सभामुख देवराज घिमिरेसँगै कार्यक्रममा सहभागी भएका रायमाझी त्यही दिन भैरहवाबाट काठमाडौं उडानमा आउने तय थियो । त्रिभुवन अन्तर्राष्ट्रिय विमानस्थलबाट नियन्त्रणमा लिन प्रहरी तैनाथ रहेकै वेला उनको उडान रद्द भएको सूचना आयो । त्यसपछि रायमाझी हराएका हराएकै छन् । 

पूर्व मन्त्री रायमाझी यो गिरोहको प्रभावशाली खेलाडी रहेको प्रहरीको दाबी छ । आफू उर्जामन्त्री भए पनि गृह मन्त्रालय र बिचौलियाका नाइकेलाई जोडिदिने काम उनैले गरेको अनुसन्धानमा संलग्न प्रहरी अधिकृत बताउँछन् । तत्कालीन गृहमन्त्री थापाका सुरक्षा सल्लाहकार इन्द्रजीत राई र बिचौलिया नाइके केशव दुलालबीच रायमाझीले सम्बन्ध गाँसिदिएको पाइएको छ । रायमाझी, दुलाल र राईबीच भाइबरमा भएका संवादले आर्थिक कारोबारको पाटो समेत उघारिदिएको ती प्रहरी अधिकृत बताउँछन् ।

अझ उनका छोरा सन्दीपको नाममा त गिरोहका सदस्यले डेढ करोड रुपैयाँको चेक काटेको प्रमाण प्रहरीले फेला पारेको छ । कारोबारको अन्य उद्देश्य समेत खुल्न नसकेको एक अनुसन्धान अधिकृतको भनाइ छ । जब नक्कली भुटानी शरणार्थी बनाएर बाहिर लैजाने धन्दा चल्यो, त्यसपछि मात्रै सन्दीपसँग यो गिरोहको आर्थिक लेनदेन भएको छ । उनीहरूबीच व्यापार व्यवसायको लेनदेन पनि देखिंदैन । यो गिरोहले पूर्व मन्त्री रायमाझीलाई विभिन्न ठाउँमा घुमाउन लगेको तस्वीर पनि प्रहरीसँग छ भने यसको फोटा पनि सार्वजनिक भएको थियो ।