रेकर्डबाट हटाइयाे सांसद रमेशजंगकाे अशाेभनीय भाषा

२६ वैशाख, काठमाडौं । नक्कली भुटानी शरणार्थी प्रकरणमा मुछिएपछि पक्राउका लागि प्रहरीबाट खोजी भइरहेको एमाले सांसद टोपबहादुर रायमाझी सम्पर्कमा नरहेको विषयलाई लिएर राष्ट्रियसभा सदस्य रमेशजंग रायमाझीले प्रयोग गरेको शब्दावली संसदीय रेकर्डबाट हटाइएको छ ।

एमाले सचिव समेत रहेका सांसद रायमाझी पक्राउ पुर्जी जारी भएपछि ५ दिनदेखि फरार छन् । यस विषयमा बोल्दै गत आइतबार राष्ट्रिय सभाको बैठकमा रमेशजंग रायमाझीले अशोभनीय र अमर्यादित भाषा प्रयोग गरेका थिए ।

रमेशजंगको उक्त भाषाको सोमबार प्रमुख प्रतिपक्षी नेकपा (एमाले)ले आपत्ति जनाएको थियो । एमालेले आपत्ति जनाएपछि राष्ट्रिय सभाका अध्यक्ष गणेशप्रसाद तिमिस्लिनाले पुनः सुनेर हटाउने निर्णय लिएका हुन् । गलत भाषा रेकर्डबाट हटाइएको सूचना अध्यक्ष तिमिल्सिनाले मंगलबारको राष्ट्रिय सभाको बैठक जानकारी दिएका हुन् । 

साथसाथै अध्यक्ष तिमिल्सनाले राष्ट्रिय सभामा बोल्दा नियमावली अनुसार शिष्ट र मर्यादित शब्दहरुको प्रयोग गर्नसमेत आग्रह गरेका छन् ।