असार जेठमा मात्रै धेरै बजेट खर्च गर्ने परम्पराको अन्त्य गरौं : अध्यक्ष यादव

२६ वैशाख, काठमाडौं । जनता समाजवादी पार्टी -जसपा_ का अध्यक्ष सांसद उपेन्द्र यादवले असार र जेठमा पुगेर मात्रै धेरै बजेट खर्च हुने परम्पराको अन्त्य नभएसम्म विकास सम्भव नहुने बताएका छन् ।

प्रतिनिधिसभाको मंगलबारको बैठकमा आगामी वर्षको बजेटका प्राथमिकता र सिद्धान्तमाथिको छलफलमा अध्यक्ष यादवले विकास बजेटको ७० प्रतिशत बजेट मात्रै खर्च हुने गरेको र त्यसको अधिकांश जेठमा मात्रै खर्च भइरहेको भन्दै त्यस्तो अभ्यासको अन्त्य गर्नुपर्ने बताए ।

उनले नेपाललाई विकासोन्मुख देशको सूचीमा उकाल्न सरकारले बजेटमार्फत आवश्यक नीति र कार्य योजना अंगाल्नुपर्ने माग गरे । उनले सार्वजनिक पद धारण गरेका व्यक्तिले सरकारी सुविधामा शिक्षा र स्वास्थ्य सुविधा लिँदा सार्वजनिक संस्थाबाट मात्रै लिन पाउने गरी कानुन बनाउनुपर्ने सुझाव दिए । उनले कुनै पनि नागरिकलाई विदेशमा उपचार गर्न सरकारले खर्च नदिने भनेर ऐन बनिसकेको भए पनि कार्यान्वयन नभएको बताए । 

सार्वजनिक पद धारण गरेका व्यक्ति वा उनका परिवारले सार्वजनिक शिक्षा र स्वास्थ्य सेवाबाहेकका संस्थाबाट सेवा लिन नमिल्ने र त्यस्तो प्रबन्ध गर्ने कानुन बनाएर कार्यान्वयनमा लैजानुपर्ने बताए । उनले काठमाडौंमै उच्चस्तरको अस्पताल बनाउन र सार्वजनिक पद धारण गरेका कोही पनि व्यक्तिलाई विदेशमा उपचारमा लैजानुपर्ने अवस्था भए त्यस्तो उच्चस्तरीय अस्पतालको सिफारिसका आधारमा मात्रै विदेश लैजान पाउने व्यवस्था गर्नुपर्ने बताए ।