प्रतिनिधिसभा बैठकको चौथो दिन : बोल्न नदिइएको विरोधमा राप्रपाद्वारा बैठक अवरुद्ध

२७ वैशाख, काठमाडौं । बजेट अधिवेशन अन्तर्गत जारी प्रतिनिधिसभाको बैठक आज चौथो दिन पनि जारी रहेको छ । बुधबार बिहान ११ बजे सुरु हुने तालिका रहे पनि केही बेर ढिला सुरु भएको छ ।

बैठक सुरु भए लगत्तै राष्ट्रिय प्रजातन्त्र पार्टी (राप्रपा)का सांसदहरुले उठेर विरोध जनाएका छन् । उनीहरूले आफूहरूलाई संसदमा बोल्न नदिइएको भन्दै बैठकमा उठेपछि केही बेर बैठक अवरुद्ध भएको छ । नाराबाजी समेत चलेकाे छ ।

बोल्नका लागि उनीहरूले सभामुखसँग आकस्मिक समय माग गरेका छन् । सभामुख देवराज घिमिरेले प्रि-बजेट छलफललाई समयमै सक्नुपर्ने भएकाले आकस्मिक समय नराखिएको प्रष्ट पारेका छन् । घिमिरेले सदस्यहरूलाई बस्न आग्रह गरेका छन् ।

राप्रपाका सांसदहरुले संसदमा बोल्न पाउँदैनौँ भने कहाँ गएर बोल्ने ?’ भन्दै उनीहरू बस्न मानेनन् । अवरोध जारी रहेका कारण बैठक अघि बढ्न सकेको छैन । राप्रपाका अध्यक्ष समेत रहेका संसदीय दलका नेता राजेन्द्र लिङ्देनले आफूहरूले बोल्न खोजेको र भ्रष्टाचारकै विषयमा कुरा राखेर छलफल गर्न खोजेको भन्दै समय मागेका थिए । सभामुखले समय दिन इन्कार गरेपछि  उठेर नाराबाजी नै गरे ।

नाराबाजीपछि सभामुख घिमिरेले बैठक १५ मिनेटका लागि स्थगित गरेका छन् । 

आइतबारबाट सुरु भएको बजेट अधिवेशनअन्तर्गत बैठकमा आइतबार नै अर्थमन्त्री डा. प्रकाशशरण महतले पेस गरेका ‘विनियोजन विधेयकका सिद्धान्त र प्राथमिकता  (कर प्रस्ताव बाहेक)’माथि सदनमा छलफल भइरहेको छ । राष्ट्रियसभामा मंगलबार नै छलफल सकिएपनि प्रतिनिधिसभामा भने चलिरहेको छ । अझै २/३ दिन लाग्ने अनुमान छ । छलफलमा सांसदहरुले धारणा राख्ने क्रम सकिएपछि अर्थमन्त्री महतले जवाफ दिने कार्यसूची रहेको छ ।