चुकुल नखोलेपछि ढोका फोडेर पक्राउ गरेका थिए पूर्वगृहमन्त्री खाणलाई

२७ वैशाख, काठमाडौं । बुधबार बिहान पूर्वगृहमन्त्री बालकृष्ण खाणलाई पक्राउ गर्ने क्रममा प्रहरीलाई निकै मेहनत गर्नुपरेको बताइन्छ । मंगलबारदेखि नै उनको निवास चावहिलको मैजुवहालमा रेकी ९निगरानी० गरेर घरमा रहेको एकिन भएपछि बुधबार बिहान काठमाडौं परिसरका प्रमुख एसएसपी मनोज केसी टोली लिएर खाणको घरमा पुगे । 

पुगेपछि उनले खाणलाई कार्यालयसम्म जानु पर्यो भनेर अनुरोध गर्दा एकछिन भन्दै ढोकामा चुकुल लगाएर भित्रै बसे । पटकपटकको आग्रहमा पनि ढोका नखोलेपछि टोलीमा खटिएका सुरक्षाकर्मीले ढोका नै फोडेर पक्राउ गरिएको जनाइएको छ । पक्राउका क्रममा तानातान समेत चलेको र खाणले ‘देख्लास्’ भन्दै धम्कीको भाषा प्रयोग गरेको स्रोतले जनायो । पक्राउ गर्दा उनी भिडियो कुराकानीमा रहेको बताइन्छ ।

नेपालीलाई भुटानी शरणार्थी बनाएर अमेरिका उडाउने भन्दै नेपाली सर्वसाधारणसँग अर्बौ रुपैयाँ उठाएर ठगी गरेको काण्डमा खाण पनि मुछिएपछि अनुसन्धानका लागि पक्राउ गरिएको हो । प्रकरणमा उनका स्वकीय सचिव नरेन्द्र केसीलाई पनि आजै पक्राउ गरिएको छ ।

प्रकरणमा खाणसहित १२ जना पक्राउ परिसकेका छन् । पूर्वमन्त्री समेत रहेका एमाले सांसद टोपबहादुर रायमाझी फरार छन् । फरार सूचीमा पूर्वगृहमन्त्री रामबहादुर थापाका छोरा प्रतीक, उनका सल्लाहकार इन्द्रजित राईका पुत्र निरज सिंह छन् ।