अनुसन्धानमा दोषी देखिएका कसैलाई पनि उम्कन दिँदैनौं : गृहमन्त्री श्रेष्ठ

२७ वैशाख, काठमाडौं । उपप्रधान तथा गृहमन्त्री नारायणकाजी श्रेष्ठले नक्कली भुटानी शरणार्थी प्रकरणमा अनुसन्धानमा दोषी देखिएका कोही पनि प्रहरीको आँखाबाट उम्कन नसक्ने बताए । 

बुधबार दिउँसो सिंहदरबारमा ३ प्रमुख दलका नेतृत्वहरुसँगको छलफलमा सहभागी भएर बाहिरिने क्रममा मन्त्री श्रेष्ठले संचारकर्मीहरुसँग कुरा गर्दै नक्कली शरणार्थी प्रकरणमा निष्पक्ष ढंगले अनुसन्धान प्रक्रिया अगाडि बढिरहेको र यसमा दोषी देखिएका कसैलाई पनि उम्किन नदिने बताए । उनले प्रकरण संगठित अपराधको रुपमा देखा परेको र यसमा पक्राउ परेका अभियुक्तहरुमा संगठित कसुरमा अनुसन्धान भइरहेको समेत जानकारी दिए । 

उनले अहिले नक्कली भुटानी शरणार्थी बनाएर विदेश पठाउने र त्यसको सन्दर्भमा संगठित ढंगले ठगी धन्दा चलाउने व्यक्तिहरु सुक्ष्म र गहन रुपमा अनुसन्धान भइरहेको बताए । प्रकरणलाई निष्कर्षमा पुर्याइछाड्ने प्रतिवद्धता व्यक्त गरे । साथै भेटवार्तामा शीर्ष नेताहरुबीच अनुसन्धानमा कुनै बाधा पुग्न नदिने सहमति भएको उनले बताए ।

प्रकरणमा अनुसन्धानका लागि हालसम्म नेपाली कांग्रेसका नेता एवं पूर्व गृहमन्त्री बालकृष्ण खाणसहित १२ जना पक्राउ परेका छन् । एमाले सांसद टोपबहादु्र रायमाझीसहित ३ जना फरार छन् । रायमाझीले भने बुधबार नै प्रहरी समक्ष आत्मसमर्पण गर्ने बताएका छन् ।