शीर्ष नेताहरुकै व्यवहार शंकास्पद, निरन्तर भेटले उब्जायो आशंका

२८ वैशाख, काठमाडौं । नेपाली नागरिकलाई नक्कली शरणार्थी बनाएर अमेरिका पठाउने गिरोहमा हाइ प्रोफाइल नेताहरू संलग्न रहेसँगै शीर्ष नेताहरूको तीब्र भेटघाटले अनुसन्धान प्रभावित हुने आशंका जन्माएको छ । गत हप्तादेखि नै शीर्ष नेताहरूको बीचमा कुराकानी शुरु भएको हो । यो कुराकानीले नक्कली भूटानी शरणार्थीको अनुसन्धानलाई प्रभावित गराउने आशंका जन्माएको छ । 

यद्यपि नेताहरूले संसद सञ्चालन र बजेटको विषयमा छलफल भएको बताउँदै आएका छन् । अर्घाखाँचीबाट निर्वाचित सांसद एवं एमाले सचिव टोपबहादुर रायमाझीलाई पक्राउ पुर्जी जारी भएपछि प्रधानमन्त्री पुष्पकमल दाहाल प्रचण्ड र पूर्वप्रधानमन्त्रीद्वय शेरबहादुर देउवा र केपी शर्मा ओलीबीच भेटघाट तीब्र बनेको छ । शुरुमा ओली र प्रचण्ड भेट भएका थिए । बालकृष्ण खाँण पक्राउ परेपछि भने दिनमै तीन पटक शीर्ष नेताहरू भेटघाट गरी छलफलमा जुटेका छन् । 

उनीहरूले बुधबार अपरान्ह पनि भेटवार्ता गरे । प्रधानमन्त्री निवास सिंहदरबारमा भएको भेटमा संसदसँग जोडिएका विषयमा छलफल भएको दाबी गरिएको भए पनि पूर्व उपप्रधानमन्त्री एवं पूर्व गृहमन्त्रीकै विषय लिएर उनीहरूको छलफल केन्द्रीत भएको थियो । खास गरी उनीहरूले नक्कली भूटानी शरणार्थीको जरोमा पुग्न लागेपछि आफ्ना नेताहरूलाई ढाकछोप गर्न लागेको भन्दै सर्वसाधारणले चासो पनि व्यक्त गरेका छन् ।

नेपाली कांग्रेसका नेता रमेश लेखकले सुनुवाइ समिति, टीआरसी विधेयक, संवैधानिक परिषद सम्बन्धी विधेयक तथा संसदीय समितिका सभापति चयन लगायतका विषयमा छलफल भएको बताए । उनको प्रतिक्रियाप्रति एमाले अध्यक्ष ओलीले पनि समर्थन जनाएका छन् । यसअघि मंगलबार बिहान पनि प्रधानमन्त्री निवास बालुवाटारमा तीन शीर्ष नेताहरूबीच छलफल भएको थियो । बजेट, सरकारको आगामी नीति तथा कार्यक्रम तथा अन्य समसामयिक विषयमा छलफल हुने कार्यसूची बताइएको थियो । तर भेटको विस्तृत विवरण सार्वजनिक भएको छैन ।

 तीन शीर्ष नेताहरूको भेट मात्रै होइन, यसअघि वैशाख २१, वैशाख २३ र वैशाख २५ मा प्रधानमन्त्री प्रचण्ड र एमाले अध्यक्ष ओलीबीच पनि भेट भएको थियो । नेताहरूको यस खालको तीव्र भेटघाटको समय सन्दर्भले प्रशस्तै शंकाहरु जन्माएको छ । नेपाली नागरिकलाई नक्कली भुटानी शरणार्थी बनाएर अमेरिका लैजाने भन्दै ठगी गर्ने गिरोहका केही व्यक्ति पक्राउ परेको र त्यसमा राजनीतिक कनेक्सन जोडिँदै नेताहरू समेत तानिएपछि अहिलेको अवस्थामा नेताहरूको भेटघाटलाई शंकास्पद रुपमा हेरिएको हो ।

उनीहरूको बयानका आधारमा मुख्य पार्टीका केही शीर्ष नेताहरू पनि तानिएका छन् । अनुसन्धान प्रक्रिया अघि बढ्ला कि नबढ्ला र दोषी माथि कारबाही होला कि नहोला भन्ने नागरिकमा आशंका व्याप्त भइरहेको बेलामा उनीहरूले भेटलाई तीव्रता दिएका हुन् । यो प्रकरणमा बुधबार मात्रै कांग्रेस नेता तथा पूर्वगृहमन्त्री बालकृष्ण खाण पक्राउ परेका छन् । एमाले सचिव तथा पूर्व उपप्रधानमन्त्री टोपबहादुर रायमाझीको नाममा गत वैशाख २० गते नै पक्राउ पुर्जी जारी भइसकेको छ । 

यद्यपि, उनी सम्पर्कविहीन भएका छन् । उनले संसदमा विरामी विदाको इमेल गरेका छन् । आफू विरामी भएर उपस्थित हुन नसकेको भन्दै इमेल गरेका हुन् । त्यसकारण अहिले केही हप्ताअघिसम्म तिक्त सम्बन्धमा रहेका र भेटघाट पनि सहज नभइरहेको पृष्ठभूमिमा अहिले बढिरहेको भेटवार्ताको क्रमले कतै उनीहरू आरोपितलाई बचाउन र थप व्यक्तिको नाम मुछिन नदिन प्रयत्नशील हुन् कि भन्ने आशंका बढाएको हाे। 

सामाजिक सञ्जालमा भ्रष्टाचारमा राष्ट्रिय सहमति जस्ता शब्दावली प्रयोग गर्दै भेटवार्ताप्रति तीखो प्रतिक्रिया व्यक्त भएका छन् । जसले गर्दा तीन नेताको भेट फरक विषयमा वा उनीहरूले दाबी गरेकै जस्तो सन्दर्भमा भइरहेको भए पनि नागरिकमा भने विश्वास देखिँदैन । ‘रायमाझी मात्र होइन आरजु र मञ्जुको समेत संलग्नता रहेको भन्दै प्रहरीले अनुसन्धान अघि बढाउने देखिएपछि शीर्ष नेताहरूको संलग्नताकाे विषयमा आशंका जन्मिएको हो’, प्रहरी स्रोतले भन्यो ।