राज्यबाट सुविधा लिने धन्दा नै चलाइयो : अध्यक्ष ओली

२८ वैशाख, काठमाडौं । नेकपा (एमाले)का अध्यक्ष केपी शर्मा ओलीले राज्यबाट सुविधा लिने काम धन्दाको रुपमा फस्टाएको आरोप लगाएका छन् ।

ललितपुरको च्यासलमा शुरु भएको पार्टीको केन्द्रीय समितिको बैठकमा बोल्दै अहिले सरकारले परिवर्तनका लागि योगदान दिएको निहुँमा बहिर्गमित लडाकूलाई राज्यको ढिकुटीबाट नगद वितरण गर्न खोजेको आरोप लगाएका हुन् । 

उनले आफूलाई पञ्चायतकाल विस्थापनमा लागि लामो समय जेल बसेको र योगदानको कदर गर्दै तत्कालीन सरकारले दिएको ७ हजार रुपैयाँ राज्यलाई फिर्ता गरेको स्मरण समेत गराए । ‘पञ्चायतविरुद्ध सशक्त रुपमा विरोध र योगदान गरेको कदरस्वरुप तत्कालीन राज्यले दिएको ७५ हजार राज्यलाई फिर्ता गरेको थिएँ’ उनले भने । आफूले पैसा लिएपछि धेरै गलत र अनधिकृत  व्यक्तिलाई लाखौं रुपैयाँ वितरण गरेको पाइएपछि इज्जतकै लागि पैसा फिर्ता गरिएको उनको भनाइ थियो । 

उनले माओवादी केन्द्रले आफ्नो नेतृत्वमा सरकार बनेको फाइदा रुपमा लडाकुलाई पैसा बाँड्ने कामलाई अगाडि बढाइएको आरोप लगाए । ‘माओवादी केन्द्रले सरकार पाउँदा पाडो किन्दा भैसी उपहार होइन कि दाम्लो किन्दा भैंसी उपहार बनायो’ उनले भने ।

सरकारले अहिले लडाकुको नाममा जनही २ लाख रुपैयाँ दिने र त्यसबाट धेरै रकम पार्टीले लिने कुत्सित योजनाअनुरुप पैसा बाँडन लागिएको गम्भीर आरोप उनले लगाए । विरोधका बाबजुद सरकारले जबर्जस्त वितरण गरिए अख्तियारले अनुसन्धान गर्नुुपर्ने बताए ।