आईपीएलमा हैदरावादमाथि आरसिबीको जित

१४ वैशाख, काठमाडौं । इन्डियन प्रिमियर लिग (आईपीएल) मा सनराइजर्स हैदराबादमाथि रोयल च्यालेन्जर्स बैंग्लोरले जित हात पारेको छ । 

राजिव गान्धी अन्तर्राष्ट्रिय क्रिकेट मैदानमा गएराति भएको खेलमा रोयल च्यालेन्जर्सले सनराइजर्स हैदराबादलाई ३५ रनले हराएको हो । 

रोयल च्यालेन्जर्सले दिएको २०७ रनको लक्ष्य पछ्याएको हैदराबाद २० ओभरमा ८ विकेट गुमाउँदै १७१ रनमै समेटियो । हैदराबादका शाहबाज अहमदले सर्वाधिक ४० रनको बनाए । यस्तै, अभिषेक शर्मा  र कप्तान प्याट कमिन्सले समान ३१/३१ रनको योगदान दिए । यसैगरी, नितिशकुमार रेड्डी र भुवनेश्वर कुमारले समान १३/१३ रन जोड्दा ट्राभिस माइकल हेड १ रनमै आउट भएका थिए ।

रोयल च्यालेन्जर्सका लागि करण शर्मा, स्वप्निल सिंह र क्यामरुन ग्रीनले २/२ तथा  विल ज्याक्सले १ विकेट लिए ।

टस जितेर पहिला ब्याटिङ रोजेको रोयल च्यालेन्जर्सले २० ओभरमा ७ विकेटको क्षतिमा २०६ रनको योगफल तयार पारेको थियो । 
रोयल च्यालेन्जर्सका लागि विराज कोहलीले सर्वाधिक ५१ रन बनाए । यस्तै, रजत पाटीदारले ५० रन जोड्दा क्यामरुन ग्रीन ३७ रनमा अविजित रहे । कप्तान फाफ डु प्लेसिसले २५ रन जोड्दा स्वप्निल सिंहले १२ र दिनेश कार्तिकले ११ जोडे ।

हैदराबादका जयदेव उनाडकटले ३, थांगारसु नटराजनले २, प्याट कमिन्स र मयंक मारकन्डेले समान १(१ विकेट लिएका थिए । रोयल च्यालेन्जर्सले लगातार ६ हारपछि लिगमा दोस्रो जित हात पारेको हो ।

रोयल च्यालेन्जर्सको ९ खेलबाट ४ अंक भएको छ । र, च्यालेन्जर्स अंक तालिकाको पुछारमा छ । हैदराबादको भने ८ खेलबाट १० अंकका साथ लिगको तेस्रो स्थानमा यथावत छ । ८ खेलबाट १४ अंक जोडेको राजस्थान रोयल्यस भने अंक तालिकाको शीर्ष स्थानमा छ ।