प्रहरी हिरासतमा रहेका पूर्वगृहमन्त्री खाँणलाई टेकुमा विशेष व्यवस्था

२८ वैशाख, काठमाडौं । नेपालीलाई नक्कली भुटानी शरणार्थी बनाएर अमेरिका पठाउने भन्दै ठगी गर्ने गिरोहलाई साथ दिएको आरोपमा बुधबार पक्राउ परेको पूर्वमन्त्री बालकृष्ण खाँणलाई अनुसन्धान अवधिभर राख्नका लागि प्रहरीले विशेष व्यवस्था मिलाएको छ । प्रेसर र मधुमेहका विरामी रहेका उनलाई अस्पताल भर्ना गराउनुपर्ने भए पनि अहिलेसम्म अस्पताल लगिएको छैन ।  

प्रहरी परिसर टेकुकाे एक स्राेतले दिएको जानकारी अनुसार खाँणलाई डीएसपीकाे अफिस रहेकाे ३ नम्बर कोठा उपलब्ध गराइएको छ । उक्त कोठामा उनले आवश्यक सुविधा पनि पाएका छन् । पत्र पत्रिका नेपाललगायतको सुविधा उनलाई प्रहरीले उपलब्ध गराएको छ । यसअघि कुनै पनि विषयको अनुसन्धानका क्रममा पक्राउ परेका विशिष्टहरुलाई सिंहदरबार वृतमा राखिने गरेको थियो ।  

हिरासतमा लिइएका उपराष्ट्रपति कार्यालयका सचिव टेकनारायण पाण्डेलाई भने सिंहदरबारमा नै राखिएको छ । टेकु परिसरमा खाँण मात्र छन् । उनलाई प्रहरीले बुधबार बिहान चावहिलको मनमैजु निवासबाट पक्राउ गरिएको थियो । उनीमाथि अनुसन्धान जारी छ ।