रास्वपा सभापति लामिछानेसँग प्रधानमन्त्रीले भने– भ्रष्टाचारविरुद्ध निर्मम भएर लाग्छु

२९ वैशाख, काठमाडौं । प्रधानमन्त्री पुष्पकमल दाहाल ‘प्रचण्ड’ र राष्ट्रिय स्वतन्त्र पार्टी (रास्वपा) का सभापति रवि लामिछानेबीच शुक्रबार बिहान भेटवार्ता भएको छ । प्रधानमन्त्रीको सरकारी निवास बालुवाटारमा भएको भेटवार्तामा समसामयिक तथा राजनीतिक विषयमा छलफल भएको प्रमको सचिवालयले जनाएको छ ।

लामिछानेले भ्रष्टाचारविरुद्ध सरकारले राम्रो काम गरेको भन्दै प्रधानमन्त्री प्रचचण्डलाई धन्यवाद दिएका छन् । भ्रष्टाचारका कुनैपनि काण्ड र फाइल खोल्न पछाडि नहट्न उनले सुझाव दिएका थिए । 

भ्रष्टाचारविरुद्ध हुने काममा आफू र आफ्नो पार्टीको साथ र समर्थन रहने लामिछानेले प्रधानमन्त्री प्रचण्डलाई जानकारी गराएका छन् । 
जवाफमा प्रधानमन्त्री प्रचण्डले भ्रष्टाचारीलाई कारबाही गर्ने विषयमा निर्मम भएर लाग्ने श्वसन दिएका छन् । छलफलका क्रममा प्रम प्रचण्डले लामिछानेलाई सरकारमा आउन आग्रह गरेका थिए ।

नक्कली भुटानी शरणार्थी प्रकरणमा पूर्वगृहमन्त्रीसहित १२ जना पक्राउ परिसकेका छन् । रास्वपाले यसअघि कुनैपनि कालका भ्रष्टाचारको फाइल खोलेर दोषीमाथि कारवाही गर्नुपर्ने पक्षमा आवाज उठाउँदै आइरहेको छ ।