रोकियो नयाँ स्टक एक्सचेञ्जको लाइसेन्स वितरणकाे प्रक्रिया

२९ वैशाख, काठमाडौं । नेपाल धितोपत्र बोर्डले सुरु गरेको नयाँ स्टक एक्सचेन्जको लाइसेन्स प्रक्रिया रोकिएको छ । नयाँ स्टक एक्सचेन्जका लागि नीतिगत भ्रष्टाचार गर्दै अमुक व्यावसायिक घरानालाई लाइसेन्स सुम्पिन खोजिएको भन्दै संसदमै तीव्र विरोध भएपछि प्रधानमन्त्री प्रचण्डले तत्कालका लागि प्रक्रिया अघि नबढाउन निर्देशन दिएसँगै रोकिएको हो । 

प्रधानमन्त्री प्रचण्डले अर्थमन्त्री डा. प्रकाशशरण महत, मुख्यसचिव शंकरदास वैरागी, अर्थसचिव अर्जुनप्रसाद पोखरेललाई बोलाएर लाइसेन्स प्रक्रिया तत्काल रोक्न लिखित रूपमा नै निर्देशन दिएका छन् । 

नयाँ स्टक एक्सचेञ्ज पुरानो र सरकारी एक्सचेञ्ज विस्थापित गर्ने गरी ल्याइएको गलत नीति भन्दै संसद्मा नै विरोध उठेको थियो । योसँगै प्रधानमन्त्री प्रचण्डले अन्तर्राष्ट्रिय अभ्यास र गहन छलफल विपरीत ल्याउन लागिएको नयाँ स्टकको लाइसेन्स प्रक्रिया रोक्न निर्देशन दिएको प्रधानमन्त्रीको सचिवालयले जनाएको छ । 

लाइसेन्स वितरण प्रक्रिया ऐनविपरीत रहेको भन्दै प्रक्रिया रोक्का गर्न अन्तरिम आदेशको माग भएको मुद्दा उच्च अदालतमा मुद्दा विचराधीन छ । मुद्दाका दुवै पक्षलाई छलफलका बोलाइएको छ । 

बोर्डले नयाँ स्टक एक्सचेन्जका लागि आह्वान गरेको आवेदनका क्रममा हिमालयन स्टक एक्सचेन्ज, नेशनल स्टक एक्सचेन्ज र अन्नपूर्ण स्टक एक्सचेन्ज गरी ३ वटा कम्पनीको आवेदन परेको छ । कमोडिटीतर्फ ४ वटा आवेदन परेको छ ।