बालुवाटार बैठक : ३ दलबीच संसदीय सुनुवाइ समितिमा सहमति

३१ वैशाख, काठमाडौं । बालुवाटार बैठकमा ३ ठूला दलका नेताहरुबीच संघीय संसदको सयुक्त संसदीय सुनुवाइ समितिको नेतृत्वमा सहमति कायम भएको छ । 

आइतबार प्रधानमन्त्री प्रचण्डको सरकारी निवास बालुवाटारमा बसेको नेपाली  कांग्रेस, नेकपा एमाले र नेकपा माओवादी केन्द्रका शीर्ष नेताहरुको बैठकले समितिको नेतृत्वमा सहमति जुटाएका हुन् ।

बैठकमा सहभागी नेपाली कांग्रेसका प्रमुख सचेतक रमेश लेखकले ३ दलले संसदीय सुनुवाइ समितिको नेतृत्वको तय गरेको बताए । थप विवरण भने उनले खुलाएनन् । उनले अन्य अन्य संसदीय समितिका सभापतिहरुमा समेत सहमति जुटाएको बताए ।

नेकपा (माओवादी केन्द्र)का प्रमुख सचेतक हितराज पाण्डेले संसदीय समितिका सभापतिहरुको नामको टुंगो आजै बस्ने कार्यव्यवस्था परामर्श समितिले गर्ने बताए । कार्यव्यवस्था समितिको अध्यक्ष सभामुख रहने व्यवस्था छ । बैठकमा दलहरुका प्रमुख सचेतक र सचेतक तथा संसदीयका उपनेताहरु समेत सहभागी थिए  ।

सुनुवाइ समिति गठन नहुँदा संवैधानिक परिषद्को निर्णयबाट संवैधानिक अंगमा नियुक्तिका लागि भएका सिफारिस भएका व्यक्तिहरुको सुनुवाई रोकिएको छ । परिषदले गत हप्ता मात्र सर्वोच्च अदालतमा प्रधानन्यायाधीश नियुक्तका लागि गरेको कायममुकायम प्रधानन्यायाधी हरिकृष्ण कार्कीमाथि सुनुवाई हुन सकेको छैन ।