काठमाडौं टावरमा निजी सवारीका लागि पार्किङ खुला

३१ वैशाख, काठमाडौं । काठमाडौं महानगरपालिकाले पुरानो बसपार्कमा बनाएको ‘काठमाडौं टावर’मा निजी सवारीसाधनका लागि पार्किङ खुला गरेको छ । अण्डरग्राउण्डमा बनाएको पार्किङमा ३ सय वटा कार र ७ सय मोटरसाइकल पार्किङ सकिने जनाइएको छ । 

यहाँ बसलाई पार्किङ अनुमति दिइएको छैन । पार्किङ निशुल्क बनाइएको छ । महानगरले अब लामो दूरीमा सबै सवारी नयाँ बसपार्कबाट सञ्चालन गर्ने भएको छ । अहिले साना सवारीलाई मात्रै पार्किङ गर्न दिइएको महानगरका प्रवक्ता नविन मानन्धरले बताए । 

दरबारमार्ग, कमलादी, बागबजार क्षेत्रमा सवारी पार्किङ निषेध गरेको महानगरले टावरमा निशुल्क पार्किङ सुरु गरेको हो ।

विस्तारै सार्वजनिक बसहरुले ‘पिक एण्ड ड्रप’ सुविधा पाउने उनले बताए । २४ रोपनीको पुरानो बसपार्कमा १२ तले टावर निर्माण चलिरहेको । ठेकेदार कम्पनीले भने टावरलाई २४ तलासम्म बनाउन अनुमति मागिरहेको छ ।