तीन दिनभित्र विषयगत समितिको बैठक राख्ने कार्यव्यवस्था समितिको निर्णय

३१ वैशाख, काठमाडौं । प्रतिनिधिसभाको कार्यव्यवस्था परामर्श समितिको आजको बैठकले ३ दिनभित्र विषयगत समितिको बैठक सुरु गर्ने निर्णय गरेको छ ।

सभामुख देवराज घिमिरे अध्यक्षताका बसेको बैठकले आगामी जेठ ४ गते प्रधानमन्त्री पुष्पकमल दाहाल ‘प्रचण्ड’सँग हुने प्रश्नोत्तर कार्यक्रम प्रभावकारी बनाउने विषयमा पनि सहमति भएको छ । 

संसदीय सुनुवाइ र राज्यका निर्देशक समितिबीच संयुक्त समिति गठन गर्ने, नीति तथा कार्यक्रम संयुक्त सभामा पेश गर्ने तयारी तथा पोशाक र प्रतिक चिन्हको प्रयोग सम्बन्धमा निर्णय भएको सभामुखको सचिवालयले जनाएको छ । 

संसद बैठकमा सांसदहरुले आकस्मिक, शुन्य र विशेष समयमा उठाएका विषय र सभामुखले दिएको रुलिङबारे सरकार जवाफदेही बनाउन संसदको भूमिका थप सशक्त बनाउने विषयमा निर्णय भएको छ । कार्य व्यवस्था समितिले संसद संचालन, बैठकमा प्रस्तुत गरिने प्रस्ताव लगायत विषयमा दलहरुका बिचमा छलफल गराएर सहमति जुटाउन भूमिका खेल्दै आएको छ ।