राती पक्राउ परेका रायमाझीलाई अदालत हाजिर गराइँदै

१ जेठ, काठमाडौं । नक्कली भुटानी शरणार्थी प्रकरणमा आइतबार राति पक्राउ परेका एमाले नेता टाेपबहादुर रायमाझीलाई आज अदालत उपस्थित गराइने भएको छ । रायमाझीलाई म्याद थपका लागि अदालत लगिने काठमाडौं जिल्ला प्रहरी परिसरले जनाएको छ । 

काठमाडौंको बुढानीलकण्ठबाट पक्राउ परेका रायमाझीलाई काठमाडौं जिल्ला प्रहरी परिसर टेकुमा राखिएको छ । उनको राति नै स्वस्थ्य परीक्षण गरिएको छ । पक्राउ पुर्जी जारी भएको ११ औं दिनमा रायमाझी काठमाडौंबाटै पक्राउ परेका हुन् । 

नक्कली भुटानी शरणार्थी प्रकरणमा संलग्न रहेको आरोपमा रायमाझीका छोरा सन्दीप रायमाझी यसअघि नै पक्राउ परिसकेका छन् । प्रहरी उच्च स्रोतले दिएको जानकारीअनुसार उनी नयाँ दिल्लीबाट काठमाडौं आइ बूढानीलकण्ठस्थित एक कार्यकर्ताको घरमा लुकेर बसेका थिए ।

उनी तिनै कार्यकर्ताको घरबाट आइतबार राति पक्राउ परेका हुन् । उनलाई पनि अनुसन्धानका लागि आज म्याद थपका लागि लैजाने तयारी गरिएको हो । रायमाझीलाई पहिले नेकपा एमालेले जोगाउन लागेको भन्दै चर्को आलोचना भएपछि निलम्बन गरेको थियो ।

सो पार्टीका अध्यक्ष केपी शर्मा ओलीले पनि रायमाझी पक्राउ नगर्न पहिले गृहमन्त्री नारायणकाजी श्रेष्ठलाई अनुरोध समेत गरेको बताइएको थियो । रायमाझीविरुद्ध पक्राउ पुर्जी जारी भएसँगै नेकपा एमालेका अध्यक्ष केपी शर्मा ओलीले भने प्रधानमन्त्री पुष्पकमल दाहाल प्रचण्डलाई भेटेर ध्यानाकर्षण गराएका थिए । ओलीले रायमाझी भाग्ने मान्छे नभएको भन्दै बाटोमै पक्राउ गर्न खोजिएको भनेर आपत्तिसमेत जनाएका छन् ।