५४ दिन वित्दा पनि तयार भएन प्रतिवेदन, अनुसन्धानमा रहेका १४ आरोपीको एकमुष्ट बयान

३ जेठ, काठमाडौं । नक्कली भुटानी शरणार्थी प्रकरणमा मुछिएका १४ जना आरोपीलाई प्रहरीले आज सरकारी वकिलको कार्यालयमा बयान गराउँदैछ । प्रहरीका अनुसार आज सबै आरोपीको बयान सक्ने तयारी छ । यस प्रकरणमा प्रहरीले ५४ दिनदेखि आरोपीलाई समाएर बयान लिँदै आएको छ । सुरुमा पक्राउ परेकाहरूको पनि आज बयान लिइनेछ ।  

प्रहरी समक्ष आत्मसमर्पण गरेका संविधानसभा सदस्य आङटावा शेर्पाको पनि आज बयान लिइँदै छ । पूर्वगृहमन्त्री बालकृष्ण खाँणसँग मंगलबार राती १० बजेसम्म बयान लिइएको थियो । उनले इन्कारी बयान दिएका छन् । नक्कली शरणार्थी प्रकरणमा संलग्न भएका भनिएका अरू केहीलाई भने प्रहरीले नियन्त्रणमा लिन सकेकाे छैन । पूर्वमन्त्री रामबहादुर थापाको छोरा प्रतीक थापा पनि अहिलेसम्म पक्राउ परेका छैनन् । 

यस प्रकरणमा संलग्न भएको भनिएका पूर्व गृहसचिव एवं हाल अख्तियार दुरुपयोग अनुसन्धान आयोगका प्रमुख आयुक्त प्रमकुमार राई, पूर्वगृहमन्त्री रामबहादुर थापा, बालकृष्ण खाँणकी पत्नी मञ्जु खाँण लगायतसम्म प्रहरी पुग्न सकेको छैन । प्रहरीले अनुसन्धान प्रतिवेदन बुझाएपछि उनीहरू उम्कने खतरा पनि बढेर गएको छ । नाम मुछिएकाहरु बारे प्रहरीले सुक्ष्म अध्ययन गरिरहेको भनिए पनि उनीहरू पक्राउ परेका छैनन् । 

बुधबार शेर्पाको प्रारम्भिक र अरू आरोपितको थप बयान लिइने जिल्ला सरकारी वकिलको कार्यालय काठमाडौंका प्रवक्ता एवं सहन्यायाधिवक्ता अच्युतमणि नेउपानेले जाकारी दिए । उनले आज प्रतिवेदन बुझाउन प्रहरीलाई भनिए पनि बयान नसकिएकाले आज प्रतिवेदन बुझ्न काम नहुने उनले बताए । नक्कली भुटानी शरणार्थी प्रकरणको अनुसन्धान प्रतिवेदन बुधवार साँझसम्म बुझाउन जिल्ला सरकारी वकिल कार्यालयले प्रहरीलाई निर्देशन दिएको थियो । 

वैशाख ३१ मा जिल्ला सरकारी वकिल कार्यालयले सो निर्देशन दिएको भए पनि सो समय सीमाभित्र अनुसन्धान प्रतिवेदन पेस नहुने पक्का भएको छ । २०७९ चैत १२ मा प्रहरीले केशव दुलाल, पाँचथरका टङ्क गुरुङ र ललितपुर घर भएका सानु भण्डारीलाई पक्राउ गरेको थियो । चैत १५ मा मोरङ घर भएका सागर राई पक्राउ परेका हुन् । हालसम्म यो प्रकरणमा पूर्व उपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँण र उपराष्ट्रपतिको कार्यालयका सचिव टेकनारायण पाण्डे सहित १४ जना थुनामा छन् ।