नक्कली भुटानी शरणार्थी प्रकरणका दोषीलाई कारवाहीका लागि दलहरुको प्रदर्शन

४ जेठ, काठमाडौं । ‘भीआईपी’ समेत पक्राउ परेका नक्कली भुटानी शरणार्थी प्रकरणका दोषीलाई कारवाहीको माग गर्दै राजनीतिक दलहरुले सडक प्रदर्शन सुरु गरेका छन् । बिहीबार सत्तारुढ नेकपा (एकीकृत समाजवादी) र प्रतिपक्षी राप्रपाले काठमाडौंमा ब्यानर, प्लेकार्ड, भ्रष्टाचारविरोधी टिसर्टसहित प्रदर्शन गरेका हुन् । 

सार्वभौम नेपालीलाई नक्कली भुटानी शरणार्थी बनाएर करोडौं ठगी गर्नेहरुलाई राज्विरुद्धको अपराध कसुरमा कारवाही गर्न प्रदर्शनकारीहरुले माग गरेका छन् । उनीहरुले नक्कली शरणार्थी प्रकरणमा निष्पक्ष छानबिन गर्न र भ्रष्टाचारका ठूला काण्डमाथि छानबिन गर्न शक्तिशाली आयोग गठन गर्न माग गरेका छन् ।

माइतीघर मण्डलमा एकीकृत समाजवादी र बसन्तपुरमा राप्रपाले विरोध पदर्शन गरे । प्रदर्शनमा सयौंले सहभागिता जनाएका छन् । नक्कली शरणार्थी प्रकरणमा हालसम्म १५ जना पक्राउ परिसकेका छन् । आजै मात्र गृहमन्त्रालयअन्तर्गतको हज समितिका अध्यक्ष शमसेर मियाँलाई प्रहरीले पक्राउ गरेको छ ।

यसअघि नेपाली कांग्रेसका केन्द्रीय सदस्यसमेत रहेका पूर्वगृहमन्त्री बालकृष्ण खाण, नेकपा एमालेका सांसद एवं पूर्वउपप्रधानमन्त्री टोपबहादुर रायमाझी, सरकारका बहालवाला सचिप टेकनारायण पौडेललगायत १४ जनालाई पक्राउ गरी अनुसन्धान गरिरहेको छ । उनीहरुविरुद्ध ठगी, संगठित अपराध, कीर्ते, भ्रष्टाचार लगायत कसुरमा अनुसन्धान भइरहेको प्रहरीले जनाएको छ । 

प्रकरणमा संलग्नताको आरोपमा सुरुमा गएको चैत १२ गते झापाका केशव दुलाल पक्राउ परेपछि बाँकी सबै तानिएका हुन् । 

आजै मात्र प्रधानमन्त्री प्रचण्डले प्रतिनिधिसभाको बैठकमा सांसदहरुको प्रश्नको जवाफ दिँदै नक्कली शरणार्थी प्रकरणमा ‘भीआईपी’हरु समेत पक्राउ परिसकेकाले छानबिन निष्पक्ष र तथ्यका आधारमा भइरहेको बुझ्न आग्रह गरेका छन् । दोषी कोहीपनि कारवाहीमा पर्नबाट नछुट्ने बताएका छन् ।