नेपाल साँंस्कृतिक संघको प्रशिक्षण भेलामा कांग्रेसका शीर्ष नेताले सम्बोधन गर्ने

५ जेठ, काठमाडौं । नेपाली कांग्रेसको शुभेच्छुक संस्था नेपाल सांस्कृतीक संघले काठमाडौंमा राष्ट्रिय प्रशिक्षण भेलाको आयोजना गर्ने भएको छ । संघको राष्ट्रिय प्रशिक्षण भेलालाई नेपाली कांग्रेसका शिर्ष नेताले सम्बोधन गर्ने भएका छन् । यहि जेठ १० र ११ गते संघले काठमाडौंमा आयोजना गरेको बृहत राष्ट्रिय प्रशिक्षण कार्यक्रमको उद्घाटन कांग्रेसका सभापति शेरबहादुर देउवाले गर्ने संघका महामन्त्री राजेन्द्र खत्रीले जानकारी दिए ।  

उनका अनुसार समापन समारोहमा भने कांग्रेसका वरिष्ठ नेता शेखर कोइराला लगायतका नेताहरुले सम्बोधन गर्ने कार्यक्रम तय गरिएको छ । संघले देशभरका कलाकर्मीलाई समेटेर राष्ट्रिय प्रशिक्षण भेला गर्न लागेको जनाएको छ । सांस्कृतिक संघले भ्रातृ तथा शुभेच्छुक संस्थाहरूलाई गहन दायित्व दिएर अगाडि बढाउँदा पार्टीलाई जीवन्त राख्न मद्दत गर्ने जनाएको छ । 

राजनीति र राजनीतिकर्मीहरूमा आएको विचलन लोकतान्त्रिक संस्कृतिको मर्म अनुकूल नरहेको स्पष्ट चित्र देखिन थालेका भन्दै संघको चिन्ता व्यक्त गरेको छ । ‘एउटा लामो कालखण्डसम्म आन्दोलनको नेतृत्व, संविधान अनि देशको सिंगो विकासको लागि महत्वपूर्ण भूमिका खेल्दै आएको नेपाली कांग्रेसमाथि आज चौतफ्री प्रहार भइरहेको अवस्थालाई नकार्न सकिँदैन । देशकै मियो पार्टी आफै रक्षात्मक अवस्थामा आइपुग्नु निश्चयनै सुखद संकेत होइन,’ विज्ञप्तिमा भनिएको छ ।

धमिलिएको राजनीतिक परिदृश्य सङ्लो बनाउन लाग्नु पर्ने कुरामा दुईमत नभएको संघका अध्यक्ष तीर्थबहादुर थापाले बताएका छन् ।