एमाले संसदमा नीति तथा कार्यक्रमको विपक्षमा उभिने

७ जेठ,काठमाडौं । नेकपा एमाले सरकारको नीति तथा कार्यक्रमको विपक्षमा उभिने भएको छ । अध्यक्ष केपी शर्मा ओलीले हिजोको बैठकमा सबै सांसदहरुलाई विपक्षमा उभिन निर्देशन दिइसकेका छन् । 

पुष्पकमल दाहाल प्रचण्ड नेतृत्वको सरकारले शुक्रवार ल्याएको नीति तथा कार्यक्रमले मुलुक र मुलुकको अर्थतन्त्रलाई गति दिन नसक्ने भन्दै आजको बैठकमा यसको  विरोधसमेत जनाउने भएको छ । 

प्रमुख प्रतिपक्ष दलका नेतासमेत रहेका अध्यक्ष ओलीले सो नीति तथा कार्यक्रमलाई पार्टीले पारित गर्न नसक्ने धारणा पनि आज बस्ने प्रतिनिधिसभा बैठकमा राख्न बताइएको छ । 

‘मुलुकलाई सहि दिशा दिनका लागि सरकारले ल्याएको नीति तथा कार्यक्रम बेकारको पुलिन्दा हो, स्वीकार योग्य छैन, समर्थन योग्य छैन । विरोध योग्य छ । र, यस्तो फाल्तु कार्यक्रम, नीतिका नाउमा दस्ताबेज पेस हुनु दुःखको कुरा हो,’ ओलीले शनिबार बसेको संसदीय दलको बैठकमा भनिसकेका छन, ‘तसर्थ, यसलाई पास गर्न मिल्दैन, हुँदैन । यसको विरोध गर्नुपर्छ । हाम्रो मुख्य पोजिशन त्यही हो ।’