माओवादी केन्द्रका सांसदले लगाए रोष्ट्रमबाटै जनयुद्धको नारा

८ जेठ, काठमाडौं । नेकपा (माओवादी केन्द्र)का सांसद माधव सापकोटाले जनयुद्धकै कारण संघीय लोकतान्त्रिक गणतन्त्रको उदय भएको बताएका छन् । सरकारले पेस गरेको आगामी आर्थिक वर्ष २०८०/८१ को नीति तथा कार्यक्रममाथि छलफलमा भाग लिँदै सांसद सापकोटाले जनयुद्ध नेपालीले आफ्नो अधिकारका लागि लडेको लडाइ भएको बताए । 

सरकारले ल्याएको नीति तथा कार्यक्रमले देश र जनताको एक वर्षको योजना र विकासका खाका समेटिएको बताए । उनले प्रमुख प्रतिपक्षी एमालेका सांसदहरुको भनाइको प्रतिवाद गर्दै जनयुद्धप्रति गौरव रहेको भन्दै उनले रोष्ट्रमबाटै जनयुद्धको स्मरणमा नारा लगाए । 

उनले सरकारले ल्याएको नीति कार्यक्रम उत्कृष्ट रहेको बताउँदै पुनर्लेखन वा फिर्ता नहुने बताए । एमाले र राप्रपाले सरकारले ल्याएको नीति तथा कार्यक्रम हचुवाको भरमा ल्याएको भन्दै फिर्ता गर्नुपर्ने बताउँदै आइरहेका छन् । 

एमाले नेतृत्वको कार्यकालमा ल्याएको नीति तथा कार्यक्रमभन्दा निकै राम्रो र व्यवहारिक भएको बताउँदै कार्यान्वयनबाट यसको औचित्य पुष्टि हुने बताए । एमालेले नीति तथा कार्यक्रमको सुरुवातीमा लेखिएको ‘जनयुद्ध’ शब्दावलीप्रति आपत्ति जनाएकाप्रति सांसद सापकोटाले ‘बैगुनी’हरुलाई आत्मसमीक्षा गर्न सुझाव दिए ।