स्विटजरल्याण्ड पठाइदिने प्रलोभनमा पारेर ठगी गर्ने एक महिला पक्राउ

८ जेठ, काठमाडौं । स्विटजरल्याण्ड पठाइदिने प्रलोभन दिएर ७ लाख रुपैयाँ ठगी गरेको आरोपमा प्रहरीले एक महिलालाई पक्राउ  गरेको छ । पक्राउ पर्नेमा काभ्रेपलाञ्चोकको बनेपा नगरपालिका–४ स्थायी घर भई हाल बाँके कोहलपुर नगरपालिका–११ दशबिघा बस्‍दै आएकी ४६ वर्षीया पार्वती थापा रहेकी छिन् ।

तुलाराम तारम मगरको उजुरीका आधारमा थापालाई काठमाडौं उपत्यका अपराध अनुसन्धान कार्यालयको विशेष टोलीले काठमाडौंको गोंगबुबाट सोमबार पक्राउ गरेको हो । अभियुक्त थापालाई थप अनुसन्धान तथा कारबाहीका लागि वैदेशिक रोजगार विभाग बुद्धनगरमा पठाइएको अपराध अनुसन्धान कार्यालयले जनाएको छ । 

मगरसँग पैसा लिएपछि उनीहरु सम्पर्कविहीन भएकी थिइन् । सुक्ष्म निगरानीमा परेका उनी प्रहरीकाे फन्दामा परेकी छन् ।