दृश्यावलोकन गराउन आजबाट काठमाडौंमा सम्पदा बस सेवा सुरु

९ जेठ,काठमाडौं । आजदेखि काठमाडौं उपत्यकामा सम्पदा बस सञ्चालनमा आउने भएको छ । काठमाडौं उपत्यकाका सम्पदाहरूको दृश्यावलोकन गराउने उद्देश्यसहित आजबाट सम्पदा बस सेवा सञ्चालनमा आउन लागेको हो । 

नेपाल पर्यटन बोर्डको व्यवस्थापनमा दुई वटा बिद्युतीय बसहरुमार्फत काठमाडौं उपत्यकाका सम्पदा देखाइने प्रमुख कार्यकारी अधिकृत धनञ्जय रेग्मीले जानकारी दिए । उनका अनुसार विश्व सम्पदा सूचीमा सूचीकृत काठमाडौँ उपत्यकाभित्रका सम्पदाहरू सम्पदा घुम्ती बस सेवाका रूपमा मंगलबारबाट हफ अन हफ अफ बस सञ्चालन हुनेछन् ।

आज ललितपुर महानगरपालिकाबाट औपचारिक रुपमा सुरु गरिने हफ अन हफ अफ बस सेवामार्फत पाटन दरबार स्क्वायर, काठमाडौँ दरबार स्क्वायर, नारायणहिटी दरबार सङ्ग्रहालय, पशुपतिनाथ मन्दिर, बौद्धनाथ र स्वयम्भूसम्म प्रारम्भिक चरणमा घुम्ती सेवा सञ्चालन हुनेछ । तत्कालका लागि यो सम्पदा बस सेवा निःशुल्क प्रयोगमा ल्याइने छ ।