वनमन्त्री महतो र शिक्षा राज्यमन्त्री प्रमिलाकुमारीले लिए शपथ

१० जेठ, काठमाडौं । मंगलबार नियुक्त भएका वन तथा वातावरण मन्त्री वीरेन्द्रकुमार महतो र शिक्षा विज्ञान तथा प्रविधि राज्यमन्त्री प्रमिला कुमारीले पद तथा गोपनीयताको शपथ लिएका छन् । राष्ट्रपति भवन शीतलनिवासमा आज बिहान आयोजित विशेष समारोहमा उनीहरुले शपथ लिएका हुन् ।

मन्त्री महतोलाई राष्ट्रपति रामचन्द्र पौडेल र राज्यमन्त्री कुमारीलाई प्रधानमन्त्री पुष्पकमल दाहाल ‘प्रचण्ड’ले शपथ गराएका हुन् । शपथ ग्रहण समारोहमा उपराष्ट्रपति रामसहाय प्रसाद यादव, प्रतिनिधिसभाका सभामुख देवराज घिमिरे, राष्ट्रिसभाका अध्यक्ष गणेशप्रसाद तिमल्सिना लगायत उपस्थित थिए । महतो र कुमारी जसपाबाट मन्त्री बनेका हुन् ।

योसँगै प्रचण्ड नेतृत्वको २५ सदस्यीय मन्त्रिपरिषदले पूर्णता पाएको छ । प्रचण्ड गएको पुष १० मा प्रधानमन्त्री नियुक्त भएका थिए । सरकारमा रहेका दलहरुबीच मन्त्रालय भागबण्डा मिल्न नसक्दा पूर्णता पाउन मुश्किल परेको थियो ।