नागरिकता विधेयक मन्त्रिपरिषद्को निर्णयमा राष्ट्रपतिले प्रमाणिकरण गर्नुपर्छ : निधी

१० जेठ, काठमाडौं । नेपाली कांग्रेसका सांसद विमलेन्द्र निधीले नागरिकता विधयेक मन्त्रिपरिषद् बैठकबाट निर्णय गराई राष्ट्रपतिले प्रमाणिकरण गर्नुपर्ने बताएका छन् । बुधबार प्रतिनिधिसभाको बैठकमा शून्य समयमा बोल्दै सांसद निधीले राष्ट्रपति कार्यालयमा पुगिसकेको अवस्थमा प्रतिनिधिसभा र राष्ट्रियसभामा फिर्ता ल्याएर छलफल गरिराख्नु नपर्ने बताए । 

यसअघिका संसदको दुवै सदनबाट पारित गरी प्रमाणिकरणका लागि तत्कालीन राष्ट्रपति विद्यादेवी भण्डारीसमक्ष पेस गरिएपनि प्रमाणिकरण हुन नसकी रोकिएको अवस्था छ । 

नयाँ राष्ट्रपतिमा रामचन्द्र पौडेल निर्वाचित भएपनि सो विधेयकलाई तत् अवस्थामा प्रमाणिकरण गर्ने कि नयाँ संसदमा पुनः छलफलका लागि फिर्ता पठाउने भन्नेबारे दलहरुबीच दुई मत देखिएको छ । 

राष्ट्रपति पौडेल मंगलबार मात्र आफूले विधेयकलाई प्रमाणिकरण नगर्ने संकेत दिइसकेका छन् । उनले नयाँ संसदबाट सिफारिस हुनुपर्ने संकेत दिएका छन् ।

प्रमुख प्रतिपक्षी दल नेकपा (एमाले) लगायत प्रतिपक्षी दलहरुले भने संसदमा ल्याई मफावार छलफल गनुपर्ने बताउँदै आइरहेका छन् । तराई क्षेत्रमा नागरिकता नपाएर हजारौं नागरिकले दैनिक काम समेत गर्न बाधा पुगेको बताइँदैछ । बुधबार पनि प्रतिनिधिसभाकाे बैठकमा सांसदहरूले नागरिकता विधेयक छिटाे पारित गर्नुपर्ने बताइरहेका छन् ।