सक्नुहुन्छ जनयुद्धको सम्मान गर्नुस्, सक्नुहुन्न अपमान नगर्नुस्, : सांसद घर्ती

१० जेठ, काठमाडौं । नेकपा (माओवादी केन्द्र)का नेता एवं सांसल पूर्णबहादुर घर्तीले जनयुद्धको सम्मान गर्न आग्रह गरेका छन् ।

बुधबार प्रतिनिधिसभाको बैठकमा सरकारको नीति तथा कार्यक्रममाथि धारणा राख्दै सांसद घर्तीले तत्कालीन माओवादीले चलाएको सशस्त्र विद्रोह जनयुद्धपछि सरकारसँग शान्ति सम्झौता गरेको १६ वर्ष बितिसक्दा पनि जनयुद्धको अपमान गर्न खोजिएको भन्दै रोष्ट्रमबाट यस्तो बताएका हुन् । 

एमालेका सांसदहरुले सरकारले ल्याएको आगामी आव २०८०/८१ को नीति तथा कार्यक्रममा जनयुद्ध शब्द राखेको भन्दै विरोध गरेपछि घर्तीले जनयुद्ध शब्दको विरोध गरेर शान्ति प्रक्रियालाई भत्काउन खोजिएको जवाफ दिए ।

‘जनयुद्ध शब्द नमान्ने भनेर के १२ बुँदे र शान्ति प्रक्रिया मान्दिनँ भन्न खोजेको हो ?’ घर्तीले भने, ‘सक्नुहुन्छ भने सम्मान गर्नुस्, सक्नुहुन्न भन्ने अपमान नगर्नुस् ।’

जनयुद्धका आएको माओवादीसँग एमालेले पार्टी एकता गरेर नेकपा बनाएको विषयबारे एमालेले जवाफ दिनुपर्ने उनले बताए । कसैले पनि स्वार्थ र पूर्वग्रही बनेर राजनीतिमा प्रस्तुत हुन  नहुने उनको भनाइ थियो । सरकारले ल्याएको नीति तथा कार्यक्रम उत्कृष्ट र आवश्यकतामा आधारित रहेको बताउँदै यसलाई संसदबाट पारित गरेर सशक्त रुपमा कार्यान्वयनमा लैजानुपर्ने बताए ।

उनले अहिलेको नीति र कार्यक्रम एमाले नेतृत्वको सरकारकै पालाका रहेको भन्नेहरुले विरोध गरेको देख्दा अचम्म लागेको बताउँदै हचुवाको भरमा टिप्पणी नगर्न सुझाव दिए । ‘त्यही बेलाका कपी पेष्ट गरेछन् भने त झनै ताली बजाएर पास गर्नुपर्ने होइन र ? उनले भने ।