प्रधानमन्त्री प्रचण्डको जेठ १७ देखि २० सम्म भारत भ्रमण तय

१३ जेठ, काठमाडौं । प्रधानमन्त्री पुष्पकमल दाहाल प्रचण्डले जेठ १७ गतेदेखि २० गतेसम्म छिमेकी मुलुक भारतको भ्रमण गर्ने भएका  छन् । नेपाल र भारत दुवै देशले प्रधानमन्त्री प्रचण्डको चार दिने औपचारिक भारत भ्रमणको तालिका सार्वजनिक गरेका छन् । नेपालको परराष्ट्र मन्त्रालय र भारतको विदेश मन्त्रालयले विज्ञप्ति जारी गर्दै नेपालका प्रधानमन्त्रीले यही जेठ १७ गतेदेखि २० सम्म भारतको भ्रमण गर्ने जानकारी दिएका हुन् ।

परराष्ट्र मन्त्रालयले भारतको विदेश मन्त्रालयसँग सहकार्य गरेर दाहालको भ्रमण जेठ १७ देखि २० सम्म गर्न गृहकार्य गरेको थियो । जसमा दुवै मुलुकले सहमति जनाएका हुन् । परराष्ट्र मन्त्रालयले विज्ञप्ति जारी गर्दै भारतीय समकक्षी नरेन्द्र मोदीको औपचारिक निम्तोमा प्रधानमन्त्री प्रचण्डले भारत भ्रमण गर्न लागेको जनाएको छ । 

प्रधानमन्त्री प्रचण्डको भ्रमण टोलीमा स्वकीय सचिवसमेत रहेकी छोरी गंगा दाहाल, मन्त्रीहरू, सचिवहरू र नेपाल सरकारका उच्च अधिकारीहरू सम्मिलित हुने परराष्ट्र मन्त्रालयले जनाएको छ । प्रधानमन्त्री प्रचण्डले भारतीय राष्ट्रपति द्रौपदी मूर्मू र उपराष्ट्रपति जयदीप धनखडसँग शिष्टाचार भेट गर्नेछन् । त्यस्तै प्रधानमन्त्रीले भारतीय समकक्षी नरेन्द्र मोदीसँग जेठ १८ गते हैदराबाद हाउसमा प्रतिनिधिमण्डल स्तरीय वार्ता गर्नेछन् । वार्तापछि संयुक्त पत्रकार सम्मेलन पनि हुनेछ ।

भारतीय प्रधानमन्त्री नरेन्द्र मोदीले प्रधानमन्त्री प्रचण्ड र नेपाली प्रतिनिधिमण्डलको सम्मानमा दिवा भोजको समेत आयोजना गर्नेछन् । त्यस्तै भारतीय विदेश मन्त्रालयले विज्ञप्ति जारी गर्दै गत पुसमा प्रधानमन्त्रीको जिम्मेवारी सम्हालेपछि प्रधानमन्त्री प्रचण्डको पहिलो विदेश भ्रमण भएको भनेको छ । प्रधानमन्त्री प्चण्ड नेपाल फर्किनुअघि मध्य प्रदेशको इन्दोर र उज्जैन भ्रमण गर्ने नेपालको परराष्ट्र र भारतको विदेश मन्त्रालय दुवैले जनाएका छन् ।

यस भ्रमणले भारतको ’छिमेकी पहिलो’ नीतिलाई अझ सुदृढ गर्दै नेपाल र भारतबीच सम्बन्ध अझ मजबुत बनाउने भारतीय विदेश मन्त्रालयले जनाएको छ । ’पछिल्ला केही वर्षमा दुई देशबीच सहकार्यका सबै क्षेत्रमा महत्त्वपूर्ण रूपमा सम्बन्ध मजबुत भएको छ,’ भारतीय विदेश मन्त्रालयले विज्ञप्तिमा जनाएको छ ।