राष्ट्रपतिद्वारा रेशम चाैधरीसहित ५०१ कैदीको सजाय माफी

१४ जेठ, काठमाडौं । सरकारको सिफारिसमा राष्ट्रपति रामचन्द्र पौडेलले रेशमलाल चौधरीसहित १९ जना कैदीबन्दीको सजाय माफी गरेका छन् ।

नेपाल सरकार मन्त्रिपरिषद्को आज बसेको बैठकले चौधरीसहित १९ कैदीको बाँकी सजाय माफी दिने निर्णय गरेपश्चा सरकारले राष्ट्रपति पौडेलसमक्ष सिफारिस गरेको थियो । साेही सिफारिसबमाेजिम कैद मिनाह गरिएकाे हाे ।

‘टोपबहादुर बुढा समेतका १९ जना व्यक्तिहरूलाई विभिन्न अदालतबाट विभिन्न मितिमा भएका फैसलाबमोजिम लागेको कैद सजाय नेपालको संविधानको धारा २७६ र मुलुकी फौजदारी कार्यविधि संहिता, २०७४ को दफा १५९ बमोजिम गणतन्त्र दिवस, २०८० को उपलक्ष्यमा माफी भएको छ’ राष्ट्रपति कार्यालयकी प्रवक्ता शैलजा रेग्मी भट्टराईद्वारा आइतबार जारी विज्ञप्तिमा उल्लेख छ ।

राजेश थलङ र ज्येष्ठ नागरिक नारायण गिरीसहित ४८२ जनालाई संविधानको धारा २७६ र फौजदारी कसुर (साजय निर्धारण तथा कार्यान्वयन) ऐन २०७४ को दफा ३७ तथा ज्येष्ठ नागरिक ऐन २०६३ को दफा १२ बोजिम बाँकी कैद माफी गरिएको उल्लेख छ । 

यस्तै रेशम चौधरी र टोपबहादुर बुढासहित १९ जनालाई संविधानको धारा २७६ र मुलुकी फौजदारी कार्यविधि संहिता २०७४ को दफा १५९ बमोजिम सोमबारबाट लागू हुने गरी बाँकी कैदसजाय माफी दिएको उल्लेख छ ।

चौधरी कैलालीको टिकापुरमा २०७२ भदौ ७ मा भएको नेपाल प्रहरीका एसएसपी लक्ष्मण न्यौपाने, इन्स्पेक्टर केशव बोहरासहित ७ प्रहरी र एक् नाबालककोा ज्यान गरी भएको घटनामा चौधरी डिल्लीबजार जेलमा जन्मकैदको सजाय काटिरहेका थिए ।

सरकारले गणतन्त्र दिवसको अवसरमा उनीहरुको बाँकी कैदसाजय माफी दिइएको हो ।

चौधरीलाई माफी दिन नहुने भन्दै पीडित इन्स्पेक्टर बोहरीकी पत्नी शारदाले आजै मात्र सर्वोच्च अदालतमा मुद्दा हालेकी छिन् ।