रासायनिक मलमा दोब्बर बजेट, अनुदान दिन ३० अर्ब विनियोजन

१५ जेठ, काठमाडौं । सरकारले रासायनिक मलका लागि बजेट दोब्बरले वृद्धि गरेको छ । सरकारले आर्थिक वर्ष (आव) २०८०-८१ को बजेटमार्फत आगामी आवका लागि ३० अर्ब रूपैयाँ रासायनिक मल खरिदका लागि विनियोजन गरेको हो ।

चालू आर्थिक वर्ष २०७९-८० का लागि १५ अर्ब रूपैयाँ रासायनिक मलका लागि विनियोजन गरिएको थियो । आर्थिक वर्ष २०७८-७९ का लागि १२ अर्ब बजेट विनियोजन भएको थियो भने आव ०७७-७८ मा ११ अर्ब रूपैयाँ रासायनिक मल खरिद लागि बजेट छुट्याएको थियो । काठमाडौँ — सरकारले किसानलाई रासायनिक मलमा अनुदान दिन ३० अर्ब रूपैयाँ विनियोजन गरेको छ । अर्थमन्त्री प्रकाशशरण महतले सोमबार संघीय संसदमा आगामी आर्थिक वर्षको बजेट प्रस्तुत गर्दै यस्तो बताएका हुन् ।

रासायनिक मल खरिद प्रक्रियामा सुधार गरी समयमै आपूर्ति सुनिश्चतता गरिने अर्थमन्त्री महतले बताए । मल आपूर्तिलाई व्यवस्थित र पारदर्शी बनाइने पनि सरकारले घोषणा गरेको छ । स्वदेशमै रासायनिक मल कारखाना स्थापित गर्न विस्तृत परियोजना प्रतिवेदन तयार गरी सार्वजनिक निजी साझेदारीमा लगानी बोर्डमार्फत काम अघि बढाइने सरकारले बजेट भाषणमा उल्लेख गरेको छ ।

किसानले समयमै रासायनिक मल नपाउने नेपालको पुरानै समस्या हो । सरकारले स्वदेशमै मल कारखाना खोल्ने बताउँदै आए पनि कार्यान्वयन भने हुन सकेको छैन ।