भारतको नक्सामा लुम्बिनी र कपिलवस्तु समेटेपछि राप्रपाको युवा संगठन आन्दोलित

१६ जेठ, काठमाडौं । भारतको  ‘अखण्ड भारत’को नक्सामा नेपाली भूमि लुम्बिनी र कपिलवस्तु समेटिएको विरोधमा राष्ट्रिय प्रजातन्त्र पार्टी (राप्रपा)निकट राष्ट्रिय प्रजातान्त्रिक युवा संगठन संघर्षमा उत्रिने घोषणा गरेको छ । 

भारतको उक्त कदमले नेपालको राष्ट्रियतमाथि प्रहार भएको संगठनको निष्कर्ष रहेको संयोजक सुजित केसीले बताए । उनले नक्सा तत्काल सच्याउन माग गरे । ‘राष्ट्रियता र सार्वभौमिकतामाथि प्रहार हुँदा चुप लागेर बस्न सकिँदैन । हामी यसको सशक्त विरोध र भर्त्सना गर्छौं र सच्याउन माग गर्छौं,’ संगठन संयोजक केसीले भने । 

भारतको नयाँ संसद भवनमा राखिएको ‘अखण्ड भारत’ नक्सामा नेपालको लुम्बिनी, कपिलवस्तु र विराटनगर समेटिएको पाइएपछि नेपालमा प्रदर्शनको संभावना बढ्दै गएको छ । भारतको उक्त कदमको देशभित्र र बाहिर रहेका नेपालीहरुले आक्रोश पोखिरहेका छन् । 

भारत सरकारको हेपाहपूर्ण व्यवहारबारे सरकारले प्रधानमन्त्री नरेन्द्र मोदीसँग सिधा कुरा गर्न संगठनले सरकारसँग माग गरेको छ । सरकारको ध्यानाकर्षण गराउन संगठनले  विरोधसभादेखि ज्ञापनपत्रसम्म बुझाउने कार्यक्रम तय भएको संयोजक केसीले जानकारी दिएका छन् ।