महिला प्रहरीलाई दूर्व्यवहार गर्ने एसएसपी पाल निलम्बित

१ असार, काठमाडौं । विवादित एसएसपी योगबहादुर पाल निलम्बित भएका छन् । प्रहरी प्रधान कार्यालयको सिफारिसमा उनलाई मन्त्रालयले शुक्रबार निलम्बन गरेको हो । महिला प्रहरीलाई गुड फ्राइडे मनाउनुपर्छ भन्दै यौन दूर्व्यवहार गरेका एसएसपी पाललाई सेवाबाट केही समयका लागि निलम्बन गरिएको हो ।

प्रहरी कार्यालयभित्रै महिला प्रहरीलाई यौन दूर्व्यवहारको आरोप लागेका एसएसपी पाललाई गृह मन्त्रालयले आज निलम्बन गरेको मन्त्रालयका एक सहसचिवले जानकारी दिएका छन् । प्रहरी प्रधान कार्यालयका प्रवक्ता डीआईजी कुवेर कडायतले निलम्बनका लागि सिफारिस गएको तर निलम्बन भएको पत्र आइनसकेको बताए । ‘सिफारिस भएको छ तर पत्र आइसकेको छैन’, उनले भने ।

नेपाल प्रहरी प्रदेश कार्यालय, कञ्चनपुरको प्रमुखको रूपमा कार्यरत रहँदा गत १९ जेठमा उनले सोही कार्यालयमा कार्यरत एक महिला प्रहरीलाई यौन दूर्व्यवहार गरेका थिए । बिदामा जान लागेकी कर्मचारीलाई निवासमा बोलाएर ‘तिमी मलाई मन पर्यो आज गुड फ्राइडे मनाउनुपर्छ’ भन्दै दूर्व्यवहार गरेका थिए । ती महिला प्रहरीको उजुरीका आधारमा छानबिन गर्दा एसएसपीको गल्ती देखिएपछि उनलाई निलम्बनका लागि पत्रचार गरिएको थियो । उनका विरुद्ध गत जेठ १९ मा उजुरी परेको थियो ।

गत १९ जेठमा एक महिला प्रहरीलाई दूर्व्यवहार गरेको घटनामा प्रहरी प्रधान कार्यालयले उनलाई त्यहाँबाट सरुवा गरेर छानबिन गरेको थियो । सुदूरपश्चिम प्रदेश प्रहरी कार्यालय, धनगढीका एसपी श्यामसिंह चौधरीको अध्यक्षतामा समिति गठन भई छानबिन समितिले एसएसपी पालको गल्ती देखाएको थियो । सो छानबिनका क्रममा अन्य महिला प्रहरीले पनि विगतमा आफूहरूलाई समेत एसएसपी पालले दूर्व्यवहार गर्दै आएको सुनाएका थिए ।

छानबिन समितिले १९ जेठको घटनाबारे कार्यालयका प्रहरी कर्मचारीसँग सोधपुछ गरेको थियो । जसक्रममा अन्य महिला प्रहरीले पनि विगतमा आफूमाथि एसएसपी पालले गरेको दूर्व्यवहारका घटना सुनाएका थिए । उनी यसअघि सोलुखुम्बू, धादिङ, बौद्धमा कार्यरत रहँदा पनि विवादमा आएका थिए । राष्ट्रिय अनुसन्धान विभागबाट प्रहरीमा सेवा परिवर्तन गरेका पालले सोलुखुम्बू र धादिङमा पनि महिला प्रहरीलाई दूर्व्यवहार गरेको खुलेको थियो ।