कोशी नाम पुनर्विचार गर्ने पक्षमा उभिए कांग्रेसका १४ जिल्ला सभापति, खेलकुद मन्त्री लिम्बूकाे बलियाे साथ

१७ जेठ, विराटनगर । नेपाली कांग्रेसको कोशी प्रदेशका १४ जिल्ला सभापति कोशी प्रदेशको नाम पुनर्विचार गर्ने पक्षमा उभिएका छन् । कोशी प्रदेशअन्तर्गतका १४ जिल्लाका कांग्रेस सभापतिहरुले बुधबार संयुक्त विज्ञप्ति जारी गर्दै कोशी नाम पुनर्विचारका लागि पार्टी नेतृत्व र प्रदेशसभासँग विशेष आग्रह गरेका छन् । 

गएको फागुन १७ मा प्रदेशसभाको बुहमत सदस्यले प्रदेशको कोशी नाम राखेपछि उक्त नाम खारेज गरी पहिचानको आधारमा नामाकरण गर्नुपर्ने माग गर्दै आन्दोलन चलाइरहेका पहिचान पक्षधरहरुले आन्दोलन चर्काउँदै लगेपछि जिल्ला सभापतिहरुले मुख खोलेका हुन् । उनीहरुले संयुक्त रुपमा जारी गरेको विज्ञप्तिमा भनिएको छ,  ‘यो विरोधको सुनुवाइ नेपाली कांग्रेसको नेतृत्वले गर्नुपर्छ ।’

मोरङ जिल्ला सभापति डिगबहादुर लिम्बु, खोटाङ सभापति विष्णु कुमार राई, उदयपुर सभापति हिमाल कार्की, झापाका सभापति देउ कुमार थेबे, संखुवासभाका सभापति दीपक खड्का, सुनसरी सभापति केदार भण्डारी, ओखलढुंगा सभापति तेजेन्द्र खनाल, सोलुखुम्बु सभापति नामगेल जाङ्बु शेर्पा, तेह्रथुम सभापति अर्जुन तुम्बाहाम्फे, इलाम सभापति डम्मर खडका, पाँचथर सभापति रुपनारायण जगेबु, धनकुटा सभापति दिनेश राई, भोजपुर सभापति विनोद राई वान्तवा र ताप्लेजुङ सभापति गजेन्द्र तुम्याहाङले पनि संयुक्त विज्ञप्तिमा हस्ताक्षर गरेका छन् ।

विज्ञप्तिमा हस्ताक्षर गर्ने मोरङ सभापति लिम्बू संघीय सरकारका युवा तथा खेलकुद मन्त्री हुन् । उनी सरकारमा संस्थापन इतर पक्षबाट मन्त्री नियुक्ति भएका हुन् ।